د ناکامورا کورنۍ د مړي لېږد لپاره افغانستان ته ورسېده
د عکس سرچینه، ARG
په افغانستان کې د وژل شوي جاپاني خیریه کارکوونکي ډاکټر تېڅو ناکامورا کونډه او مشرۍ لور نن 'جمعه ۶ دسمبر ' افغانستان ته رسېدلې دي چې د ده مړى له ځان سره يوسي.
دی او پنځه افغان ساتونکي يې نامعلومه وسله والو چهارشنبه په يو وسله وال بريد کې د افغانستان په ختيځ ښار جلال اباد کې ووژل.
د افغانستان ولسمشرۍ ماڼۍ په یوه خبرپاڼه کې ویل شوي، ولسمشر محمد اشرف غني د ناکامورا له کونډې او لور سره په لیدنه کې له هغوی سره خواخوږي څرګنده کړې، د دغه وژل شوي خیریه کارکوونکي د خدمتونو ستاینه کړې، د هغه وژل کېدل یې یوه لویه فاجعه بللې ده.
خبر پاڼه د ولسمشر غني له قوله زیاتوي چې ټول افغانان د دغې پېښې له کبله غمجن دي.
ولسمشر غني وايي، افغانان ډاکټر ناکامورا ته د افغانستان د یوه ستر شخصیت په سترګه ګوري او کورنۍ یې د افغانانو په زړونو کې ځای لري.
د مرستندويې ټولنې د دغه مشر وژل کېدو په افغانستان او نړۍ کې پراخ غبرګونه لرل.
۷۳ کلن ناکامورا پر سینه ښۍ خوا ته ویشتل شوی و چې له برید ورسته سم لاسي روغتون ته وړل شوی و او بګرام ته د لېږدولو پرمهال یې د جلال اباد هوايي ډګر کې یې سا ورکړه.
په خوست کې يوه څلور لارې د ده په نامه شوې، په جلال اباد، کابل او خوست کې يې يادغونډې شوې دي.
د عکس سرچینه، Getty Images
له دې مخکې پرون 'پنجشنبه ' د ننګرهار والي شاه محمود میاخېل وویل، په جلال اباد کې د جاپاني وژل شوي خیریه کارکوونکي تېڅو ناکامورا د وژنې پلان له افغانستانه بهر چمتو شوی و.
د ښاغلي ناکامورا له وژل کېدو دوې ورځې وروسته ښاغلي میاخېل د دغې پېښې په تړاو ډېر جزیات نه دي ورکړي، خو په خبره یې د دغې پېښې په تړاو یې ځینې شواهد موندلي دي.
ډاکټر تېتسو ناکامورا تر افغانستان وړاندې په پښتونخوا کې پر مرستندويو کارونو بوخت و. هلته ده له خپل مسلک سره سم د بې وزلو خلک درملنه کوله.
تېڅو ناکامورا چې له کلونو راهیسې د اوبو مدیریت او د خلکو خیر ښېګړې چارو کې فعال و، وړمه ورځ په جلال اباد کې نامعلوموو کسانو له خپلو پنځو افغان ملګرو سره یو ځای وواژه.
