افغانستان د نړۍ تر ټولو نا امنه هېواد وبلل شو

په یوه تازه درجه بندۍ کې افغانستان له سوریې مخکې شوی او د نړۍ تر ټولو نا امنه هېواد بلل شوی دی. دغه درجه بندي د سولې او اقتصاد انسټیټیوټ له لورې خپره شوې ده چې مرکز یې د اسټرالیا په سډني کې دی.

دغې ادرارې د پروسږ کال په درجه بندۍ کې سوریه د نړۍ تر ټولو نا امنه هېواد بللی و. د افغانستان او سوریې تر څنګ سویلي سوډان، یمن او عراق هم هغه یادونه دي چې د نوې درجه بندۍ په سر کې یې نومونه یاد شوي دي.

د دغې درجه بندۍ په لېست کې بیا ایسلنډ، نیوزیلنډ، پرتګال، اتریش او ډنمارک د نړۍ تر ټولو امن هېوادونه بلل شوي دي.

ایران ته د ۱۶۳ هېوادونو په دغه نوملړ کې ۱۳۹ ځای ورکړل شوی دی او د افغانستان نور ګاونډي هېوادونه لکه تاجکستان ۱۰۵، قرغیزستان ۹۵، ازبکستان ۱۰۲ او ترکمنستان ۱۱۵ ځای لري.

څېړنه کې ویل شوي، تېرو پنځو کلونو کې لومړی ځل په اوسط ډول نړۍ کې امنیت یو څه ښه شوی دی.

د څېړونکو په وینا د هېوادونو په کچه د امنیت ښه کېدو نسبي کچه صفر اعشاریه نهه وه، چې دا لومړی ځل و او پر همدې بنسټ په لېست کې ۸۶ هېوادونه داسې یاد شوي چې د امنیت حالت پکې ښه شوی دی او له دې په کم شمېر یانې ۷۶ هېوادونه داسې یاد شوي چې د امنیت حالت پکې د مخکې پرتله خراب شوی.

په نړیواله کچه د ځینو کړکېچونو کمېدل د امنیت ښه کېدو لاملونه بلل شوي دي، چې د څېړونکو په خبره له کبله یې د مړینې کچه لږ شوې ده.

خو څېړونکي وايي، له دې پرمختګ سره هم د یوې لیسیزې پخوا پرتله نړۍ ډېره نا امنه ده.

څېړونکي وايي، تېرو لسو کلونو کې یوازې د دریو تېرو کلونو پرتله د امنیت حالت ښه شوی دی. دغه راز د یوې لسیزې پخوا پرتله اوس د امنیت حالت ناوړه کېدو له ډېرو لاملونو د ترهګریزو فعالیتونو ډېرېدل، په منځني ختیځ کې د کړکېچونو پراختیا، په ختیځه اروپا، شمال ختیځه اسیا کې کې د سیمه ییز تاوتریخوالي ډېرېدل، د کډوالو شمېر زیاتېدل او امریکا او اروپا کې د سیاسي کړکیچونو ډېرېدو یادونه شوې ده.