افغان ټاکنې: دوه ورځو کې یو زر شکایتونه ثبت شوي
د عکس سرچینه، Getty Images
- Author, ملایکه احمدزۍ
- دنده, بي بي سي
افغانستان کې د ټاکنیزو شکایتونو کمېسیون چارواکي وايي، د کابل او کوچیانو لومړنیو پارلماني ټاکنو پایلو په اړه يې شاوخوا زر شکایتونه په دوو ورځو کې ثبت کړي دي.
په داسې حال کې چې د دې هېواد د ټولو ولایتونو لومړنیو پایلو په اړه یوازې درې زره شکایتونه ثبت شوي وو.
د کابل رایې تر نورو ډېرې جنجالي وې او په لومړیو کې دا رایې د ټاکنیزو شکایتونو کمیسیون لخوا باطلې اعلان شوې وې.
د ټاکنیزو شکایتونو کمیسیون چارواکي وايي، د نورو ولایتونو پر تله د کابل او کوچیانو پارلماني ټاکنو پایلو په اړه شکایتونه ډېر وو، چې په خبره یې تېره شپه یې تر دولسو بجو شکایتونه ثبتول.
ثبت شوي شکایتونه به د کمیسیون ولایتي دفتر کې تر ۱۵ ورځو ارزول کېږي، بیا درې ورځې استناف غوښتنې لپاره وخت ورکول کېږي او ۱۵ ورځې يې د کمیسیون په مرکزي دفتر کې په ارزولو تېریږي.
د یاد کمیسیون غړی غلام دستګیر هدایت وايي، دمګړۍ دوی د همدې شکایتونو په ارزولو بوخت دي.
د کابل ټاکنیزو رایو له دې مخکې هم ګڼې ناندرۍ رامنځته کړې وې. لومړی دا رایې د شکایتونو کمیسیون لخوا باطلې وبلل شوې، خو وروسته بیا د ټاکنو کمیسیون سره د یوې هوکړې پر بنسټ معتبرې وګڼل شوې.
د عکس سرچینه، Getty Images
د شکایتونو کمیسیون چارواکي وايي، د نورو ولایتونو د استناف دورې ۳۰۰۰ زره شکایتونو څخه یې ډېره برخه ارزولې چې له مخې یې د لسو ولایتونو پایلې تېره اونۍ کمیسیون ته استولې.
د دوی په خبره را روانه شنبې به د لسو نورو ولایتونو پایلې هم د ټاکنو کمیسیون ته واستوي. د افغانستان پارلماني ټاکنې د روان کال دتلې میاشتې پر ۲۸ او ۲۹ مه وشوې.
د کندهار ټاکنې د امنیتي ستونزو له کبله د یوې اونۍ په ځنډ سره ترسره شوې. د غزني ولایت پارلماني ټاکنې بیا د سیاسي ناندریو له کبله تر ولسمشریزو تر ټاکنو پورې وځنډېدې.
