تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
کابل کې پر برتانوي شرکت برید؛ "۱۰ وژل شویو کې یو برتانوی او ۳ نور بهرنیان هم دي
د افغانستان د کورنیو چارو وزارت وايي، کابل کې د پنجشنبې په شپه پر جي فور اېس برتانوي شرکت د برید له امله د څلورو بهرنیانو په ګډون لس کسان وژل شوي دي.
د کورنیو چارو وزارت ویاند نصرت رحیمي د بي بي سي خبریالې زمزمې نیازۍ ته د پنحشنبې په ورځ (د نومبر۲۹) وویل، په وژل شویو بهرنیانو کې یو برتانوی دی او د نورو ملت لا معلوم نه دی.
د هغه په خبره، په دغه برید کې ۲۷ کسان ټپیان شوي چې یوولس نېپالیان او پنځه برتانویان دي.
د برتانیا حکومت تر دې دمه د خپلو څلورو اتباعو د وژل کېدو پخلی نه دی کړی.
ویل کېږي د برید پر مهال د ۳۶ افغانانو په ګډون۳۳۰ بهرنیان په دغه مرکز کې و، چې د څو ګړیو لپاره بریدګرو کلابند کړي وو.
دغه برید د ښار نهمې حوزې سیمه کې چارشنبه ماښام د جي فور اېس په نوم د برتانوي شرکت دروزه کې موټر بم چاودنې سره پیل شو.
دا شرکت نهمه حوزه کې د کابل- جلال اباد پر سړک له ټاکنو کمېسیون او کابل نړویوال هوايي ډګر ته څېرمه پروت دی.
د کابل د امنیه قومندانۍ ویاند د پنجشنبې په ورځ د کابل امنیه قومندانۍ ویاند بصیر مجاهد د بي بي سي خبریال محفوظ ذبیدي ته وویل: "برید ماښام نږدې شپږ نیمې بجې پیل او سهار څلور بجې پای ته ورسېد".
د بصیر مجاهد په خبره، موټر بم پسې وسلوال شرکت ته ننوتل او د امنیتي ځواکونو سره یې نښته پیل کړه، چې تر لس ګړیو وروسته د پنجشنبې په ورځ (د نومبر پر ۲۹) پای ته ورسېده.
نوموړي په خبره، له موټر بم برید وروسته څلور وسلوال کمپ ته ننوتل.
"له امنیتي ځواکونو سره یې نښته پیل شوه او د سهار څلور بجې له منځه یووړل شول".
د هغه په خبره، په دې برید کې لس کسان وژل شوي او ۲۹ ټپیان دي چې یو شمېر بهرنیان هم پکې شته.
د کورنیو چارو وزارت ویاند نجیب دانش هم وايي، چې برید کې لس کسان وژل شوي او ۲۹ ټپیان دي.
د افغانستان عامې روغتیا وزارت چارواکو د برید لومړیو کې ویل دغه پېښه کې ۱۰ کسان وژل شوي او ۱۹ نور ټپیان دي.
وسله والو طالبانو رسنیو ته د اعلامیې استولو سره د دې برید مسوولیت منلی.
د دې ډلې ویاند ذبیح الله مجاهد وايي، په دغه برید کې یې پر افغان ځواکونو سربېره بهرنیو پوځیانو ته هم مرګ ژوبله اړولې ده.
دغې ډلې رسنیو ته په یوې استول شوې خبرپاڼه کې ویلي، دا برید یې د هغو عملیاتونو په غبرګون کې کړی چې په بېلابېلو ولایتونو کې یې ملکي کسانو ته مرګ ژوبله اړولې.
ځینې سرچینو په دې عملیاتو کې د مړو شمېر له شلو ډېر ښودلی دی.
دغه برید شاوخوا څلور ساعته وروسته له هغې کیږي چې ولسمشر محمد اشرف غني د جینوا په غونډه کې له طالبانو سره د خبرو لپاره یوه دوولس کسیزه ډله اعلان کړه.
