ای‌ پي‌ ايل؛ "د دهوني مینه وال به ده ته تر ۷۵ کلنۍ هم د تقاعد اجازه ورنه کړي"

"دا سړی د اتل په څېر دی. نیم لوبغالی د هغه له مینه والو ډک وي، چې د تمرین پر مهال یې یو څرک وویني. مینه وال به یې ده ته تر ۷۵ کلنۍ هم اجازه ورنه کړي چې تقاعد شي.‌"

دا توري هند کې د کرېکټ یوه مشهور مبصر "هرشا بهوګل" د هند د ملي لوبډلې د پخواني لوبډلمشر او ای پي ایل کې د چینای سوپر کینګز د کپتان 'مهیندر سینګ دهوني' لپاره وکارول.

چینای سوپر کینګز د روان ای پي ایل په منځلوبه کې د تېر کال اتل 'ګجرات ټایټنز' ته په ۱۵ منډو ماتې ورکړه او ځان یې پایلوبې ته ورساوه.

چینای سوپر کینګز د ای پي ایل په تاریخ کې ۱۲ ځلې وروستي پړاو ته لار موندلې او سږ کال یې د لسم ځل لپاره پایلوبې لوبوي.

دا دواړه د خپل ډول ریکارډونه دي.

چینای سوپرکینګز څلور ځلې د ای پي ایل اتلولي ګټلې او ممبۍ انډینز پنځه ځلې دا ټورنمنټ ګټلی دی.

اوس پوښتنه دا ده، چې ایا د چینای سوپر کینګز لوبډلمشر مهیندر سینګ دهوني به د پنځم ځل لپاره دا اتلولي وګټي او له همدې ویاړ سره به له ای پي ایل رخصت واخلي؟

او ایا د چینای ښار اوسېدونکي به بیا هغه دلته د لوبې پرمهال وویني، که څنګه؟

سږ کال چې دهوني هر ځای لوبه کوله، د مینه والو جوپې به پرې رامتې وې او لوبغالی به د ده د لوبډلې زېربخنه جامو په سر اخیستی و.

د کرېکټ مبصرین تل دا پوښتنه کوي، چې ایا دا د دهوني وروستی ای پي ایل دی، چې خلکو دومره ګڼه ګوڼه جوړه کړې؟

هرشا بهوګلي تېره شپه نیغ په نیغه خپله له دهوني همدا پوښتنه وکړه او نوموړي په خپل اندازه کې ورته ځواب ورکړ.

هرشا بهوګلي: ایا د چینای مینه وال به تاسې بیا دلته وویني چې لوبه کوئ؟

دهوني: تاسو هڅه کوئ پوښتنه وکړئ، چې ایا زه به دلته بیا لوبه کوم که نه؟

هو: 'ایا ته دلته راځې او بیا لوبې کوې؟'

دهوني په خندا وویل: "زه نه پوهېږم، زه اته یا نهه میاشتې وخت لرم چې پرېکړه وکړم، نو اوس ځان ته سرخوږی ولې جوړ کړم. د پرېکړې کولو لپاره ډېر وخت لرم. - نه پوهېږم، چې زه به له دې (ټیم) سره د یوه لوبغاړي په توګه پاتې شم که کوم بل مسوولیت به اخلم، خو دا معلومه ده چې له چینايي‌ سوپر کینګز سره پاتې کېږم."