شپږیزه: د راشد خان "بند امیر" او د محمد نبي "مس عینک" پایلوبه کوي
د عکس سرچینه، ACB
د افغانستان شپږیزې لیګ کرېکټ سیالیو کې د راشد خان بند امیر او د محمد نبي مس عینک لوبډلې د دې سیالیو پایلوبې ته ورسېدلې. دغه دواړه لوبډلې به سبا د اکتوبر پر ۱۸مه نېټه د دې سیالیو په پایلوبه کې مخامخ شي. مس عینک به دې سیالیو کې د خپلې اتلولۍ دفاع کوي.
په لومړۍ نیمه پایلوبه کې پرون اکتوبر شپاړسمه، د محمد نبي په مشرۍ مس عینک اتلانو بند امیر ښامارانو ته په ۷ وېکټه ماتې ورکړې او پایلوبې ته یې لار موندلې ده.
نن پنجشنبه په دویمه نیمه پایلوبه کې د راشد خان په مشرۍ بند امير ښامارانو لوبډلې کابل بازانو لوبډلې ته په ۳ منډو ماتې ورکړه او پایلوبې ته ورسېدله.
د عکس سرچینه، ACB
بند امیر ښامارانو په نننۍ لوبه کې د پچې له ګټلو وروسته په ټاکلو ۲۰ اورونو کې د ۲ لوبغاړو په سوځېدو ۲۲۵ منډې وکړې، چې دا د شپږيزې کرکټ ليګ د تاریخ تر ټولو زیاتې منډې دي او کابل بازانو ته یې د ۲۲۶ منډو هدف وټاکه. د بند امير ښامارانو له لوري عمران جنت او جاويد احمدي د روانې شپږيزې کرکټ ليګ د تاريخ تر ټولو لویه د ۱۷۶ منډو ملګرتيا جوړه کړه.
عمران جنت همدا راز ۱۱۵ ناسوځېدلې منډې وکړې او د روانې شپږيزې ليګ دریم توپوهونکی شو چې سليزه يې ووهله. د ۲۲۶ منډو هدف ته د رسېدو لپاره کابل بازانو ملا وتړله، خو په ۲۰ اورونو کې يې د ۶ لوبغاړو په سوځېدو ۲۲۲ منډې وکړې او په ۳ منډو يې لوبه وبايلله.
د کابل بازانو له لوري یونس احمدزي ۵۳، کریم جنت ۵۱ او سميع الله شينواري ۴۰ منډې وکړې.
د عکس سرچینه، ACB
له دې مخکې پرون اکتوبر شپاړسمه، مس عینک اتلانو بند امیر ښامارانو ته په ۷ وېکټه ماتې ورکړې وه او پایلوبې ته یې لار موندلې. په هغه لوبه کې د بند امير ښامارانو په ټاکلو ۲۰ اورونو کې د ۶ لوبغاړو په سوځېدو سره ۱۵۷ منډې وکړې چې د افسر ځاځي تر ټولو ډېرې ۵۶ ناسوځېدلې منډې هم پکې شاملې وې.
مس عينک اتلانو لوبډلې په ۱۹.۱ اورونو کې د ۳ لوبغاړو په سوځېدو سره د د ۱۵۸ منډو هدف پوره کړ او په ۷ ويکټو يې د بند امير ښامارانو لوبډلې ته ماته ورکړه. د دغې لوبډلې له لوري رحمان الله ګربز تر ټولو ډېرې ۸۰ منډې وکړې.
