خوست کې د ورځې ۳۰ کسان په ملاریا اخته کېږي

کلونه وړاندې د افغانستان د عامې روغتيا وزارت ادعا کړې وه چې په هېواد کې د سختې ملاریا له منځه وړلو ته ور نږدې شوي دي، خو لا هم یې په افغانستان کې زرګونه بېلګې شته.

خوست، ننګرهار، لغمان او کونړ د افغانستان هغه ولایتونو دي چې د ملاریا ناروغۍ پېښې پکې تر نورو ډېرې ثبت شوې دي.

د افغانستان د سوېل لوېديځ ولایت خوست چارواکي وايي، په تېرو شپږو میاشتو کې په دغه ولایت کې څه باندې ۵ زره کسان په ملاریا اخته شوي دي.

د خوست د عامې روغتیا ریاست چارواکي وایي، ځاځي میدان، علیشېر، اسمعیل خېل مندوزي ولسوالۍ او مرکز اوس هم د ملاریا ناروغۍ له جدي ګواښ سره مخامخ دي.

خوست کې له ملاریا سره د مبارزې مرکز مشر ډاکتر ګلاب جان منګل وایي، تر هغه به خوست کې د ملاریا ناروغي کمه نه شي چې پرټولو خلکو جالۍ (پشه خانې) ونه وېشل شي:

"سږ کال مو د خوست په بېلابېلو ولسواليو کې ۱۵۰ زره جالۍ وېشلي، په داسې حال کې چې موږ په هرو څلورو کلونو کې د ۸۰۰ زره پشه خانو وېش ته اړتیا لرو. "

نمجنه هوا، ولاړې اوبه او د وګړو ډېروالی د ملاریا ناروغۍ لوی لاملونه دي.

د خوست د موسی خېلو ولسوالیو یو اوسېدونکی مجاهد ادعا کوي چې له تېرو څو کلونو د ملاریا ناروغۍ له ډېروالي کړېږي، خو پشه خانې نه دي پرې وېشل شوي: " زموږ په ولسوالۍ له څو کلونو پشه خانې نه دي وېشل شوي او د خلکو اقتصادي توان هم دومره نه دی چې په شخصي لګښت یې واخلي"

که څه هم د ملاریا ناروغي په میاشتیني ډول سلګونه خوستوال رنځوروي، خو د عامې روغتیا ریاست چارواکي وايي، له ملاریا د مړو شویو کسانو شمېره یې نه ده ثبت کړې.

د راپورونو له مخې، تر کورنیو جګړو وړاندې افغانستان د دواشیندنې پر مټ د ملاریا ناروغي کابو کړې وه، خو د عامې روغتيا چارواکي وايي، د دوا شیندنې لګښتونه نه شي پوره کولی او دمګړۍ یې پر وړاندې د مبارزې اسانه لار د جالیو وېش دی.

په ۲۰۱۶ کې د ملاریا په تړاو د ملګرو ملتونو رپوټ نه دی خپور شوی، خو د ۲۰۱۵ کال شمېرې ښيي چې له ټولې نړۍ ۲۱۲ میلیونه پېښې ثبتې شوې دي.

پر ملاریا د اخته کسانو له ډلې ۴۲۹ زره یې مړه شوي چې ډېره برخه یې افریقايي ماشومان دي.