Muinntir Eige airson seann eaglais a dhèanamh na ionad dualchais

Tha Urras Dualchas Eilean Eige a’ feuchainn ri maoineachadh fhaighinn airson eaglais san eilean a ghabhail thairis agus Eaglais na h-Alba an dùil a reic.

Tha iad a' faicinn gur e cothrom math a bhiodh ann goireas a stèidheachadh far an tèid sgeulachd an eilein a mhìneachadh.

Ged a bhios am ministear a bhios a' frithealadh Eige agus na h-Eileanan Tarsainn eile gu bhith a' leigeil dheth a dhreuchd, tha iad airson dòigh a lorg seirbheisean a chumail a' dol fhathast bho àm gu àm.

Tha ceangal làidir aig Catriona NicFhionghain leis an eaglais.

'S ann às na Hearadh a tha i agus bha a h-athair, a bha na mhiseanaraidh, air a chur a shearmonachadh ann do dh'Eaglais na h-Alba anns an eaglais bhig a bhios iad a' reic a dh'aithghearr.

"'S e briseadh-dùil a th' ann nuair a bhios mi a' dol ann.

"Chan eil am ministear againn a' tighinn a-nall ach dhà no trì tursan sa bhliadhna agus tha esan a' leigeil dheth a dhreuchd deireadh a' mhìos a tha seo," thuirt i.

Bha Peigi Kirk cuideachd a' dol gu seirbheisean an Eaglais na h-Alba ged 's e Caitligeach à Uibhist a Deas a th' innte.

Mhìnich i gun robh an sagairt air falbh às Eilean Eige nuair a thàinig i a dh'fhuirich ann ann an 1959.

Cha robh leisg air Peigi agus na Caitligich eile san eilean a dhol dhan eaglais Phròstanach ach chan eil e an-diugh cho furasta dhi faighinn thuice.

"Tha e car cas a' dol suas innte agus chan eil mi math gu coiseachd a-nis.

"Bidh mise 94 air an ath-mhìos," thuirt i.

Ged a tha an dà chuid Catriona agus Peigi duilich gu bheil suidheachadh ann far a bheil glè bheag de luchd-amhraidh air fhàgail agus gum feumar an eaglais a bhith air a reic, tha eileanaich eile a' faicinn cothroim togalach ann an teis-mheadhan na coimhearsnachd a cheannach.

"'S e goireas mìorbhaileach a bhiodh ann do luchd-tadhail ma 's urrainn dhuinn a cheannach agus àite a chruthachadh far an tèid againn air eachdraidh an eilein agus mar a tha an t-àite an-diugh agus mar a bhios e san àm ri teachd innse," thuirt Camille Dressler bho Ionad Dualchais Eige.

Fon phlana aca bhiodh an eaglais fhathast ri faotainn mar àite adhraidh agus airson seirbheisean tìodhlaicaidh is bainnsean.