"Èirich, cuir romhad a dhèanamh agus dèan e!"

'S i Seonag NicAnndrais a tha air Duais Dèan Diofar BBC Radio nan Gàidheal a bhuannachadh.

Chaidh an duais a thoirt dhi gu h-oifigeil aig cuirm ann an Glaschu.

'S e an obair a rinn Seonag gu saor-thoileach airson faisg air 15 bliadhna do bhuidhnean carthannais gun dùil ri cliù neo cosnadh a dh'fhàg gun deach a cur air adhart.

Tha i ag ràdh gu bheil i "airson a chur air ais dhan choimhearsnachd airson buidhnean beaga nach eil a' faighinn dad".

"Tha e a' toirt toileachais dhomh," thuirt i.

Tha i a' tomhas gu bheil na cèilidhean, rafailean agus tachartasan eile a chuir i air dòigh air timcheall air £50,000 a thogail.

A bharrachd air airgead a thogail tha i ag radh gu bheil i "a' cur ri beatha nan Gàidheal" an Inbhir Nis le bhith a' toirt cothrom dhaibh tighinn còmhla mar a chleachd.

"Cha bhi coibhneas aig daoine mar a th' aig Gàidheil agus na h-Eileanaich," tha Seonag ag ràdh.

"Tha i còir, càirdeil, spòrsail, daingeann - ma tha i airson càil a dhèanamh - eirmseach agus bheireadh i gàire air duine sam bith."

Chuir Ceitidh Ann NicThòmais eòlas air Seonag nuair a ghluais i a dh'Inbhir Nis an toiseach agus tha i an sàs ann an "Sgioba Seonaig" a' cumail taic rithe.

"Tha i airidh air an duais seo oir tha i air tòrr obrach a dhèanamh."

Thuirt Ceitidh Ann gu bheil i air a bhith nas trainge buileach on bha Covid ann.

"Bhiodh i a' dèanamh bèicearachd gus silidh a-staigh agus bhiodh i a' falbh agus a' fàgail stuth aig dorsan dhaoine.

"'S dòcha gum fosgladh tu doras agus bhiodh cèic romhad aig an doras agus bha i a' dèanamh sin fad a' ghlasaidh."

Thàinig Kathleen Mhoireach a dh'fhuireach ann an Inbhir Nis bho chionn ochd bliadhna.

Bha i a' roimhe an sàs ann a bhith a' cur air dòigh nam mòdan ionadail an Cille Bhrìghde an Ear.

"Bhiodh sinn a' bruidhinn ri Seonag air a' fòn agus cha robh càil a dh'fhios againn cò a bh' innte."

Bhon ghluais i a dh'Inbhir Nis tha i air eòlas a chur air Seonag.

"Tha uiread de phlòigh innte agus tha i cho còir. Cha d' fhuair mise seachad air na bha i a' dèanamh do dhaoine eile," thuirt Kathleen.

Tha an seinneadair Fiona J NicCoinnich ag obair còmhla ri Seonag ann an oifis a' Chomuinn Ghàidhealaich ann an Inbhir Nis.

Chuir i eòlas an toiseach oirre ge-tà, nuair a bha Seonag a' dèanamh nan deuchainnean cànain dhaibhsan a bha airson a bhith a' seinn aig a' Mhòd sna farpaisean mòra.

"Tha i ag obair fad an là, fad na h-oidhche fiù 's, airson nan tachartasan agus tha sinn daonnan a' coimhead air adhart ris an ath-thachartas.

"Tha i daonnan a' beachdachadh air cò as motha a tha feumach air an airgead a thogas i.

"'S e boireannach sònraichte a th' innte," thuirt Fiona.

Thuirt Seonag gur e urram mòr a bh' ann a bhith i air geàrr-liosta Duaisean Dèan Diofar aig Radio nan Gàidheal is i a-nise air an duais fhèin a bhuannachadh.

Tha feallsanachd shìmplidh aice airson daoine a bhrosnachadh.

"Èirich, cuir romhad a dhèanamh agus dèan e!

"Fhad 's a bhios mo shlàinte agam agus tha làithean agus i caran cugallach ach tha mi ag èirigh agus tha mi a' dèanamh mo dhìchill."

Thuirt Seonag gun robh i air a dòigh buannachadh is gun robh a h-uile duine air an liosta airidh air duais.

'S i an rothaiche Kerry Nic a' Phì a bha na britheamh 'son nan duaisean is i ag ràdh gun robh an taghadh seo nas duilghe na rèis sam bith a rinn i.

Chaidh àrd-mholadh a dhèanamh air an fheadhainn eile a bha air a' gheàrr-liosta, Iain 'Brownie' Moireasdan, Lorna NicCarmaig, is Comataidh Rannsachadh Aillse UK ann an Leòdhas.