Plàc do dh'Anndra air a leagail bho Thalla-baile Inbhir Nis
'S e fear de na tiotalan a bha uair aig Andrew Mountbatten-Windsor Iarla Inbhir Nis
- Air fhoillseachadh
Chaidh plàc air taobh a-muigh Talla-baile Inbhir Nis a chuireadh ann nuair a chaidh Anndra Mountbatten-Windsor dhan bhaile ann an 2018 a thoirt a-nuas.
Bha e a' comharrachadh turas an t-seann phrionnsa airson an togalach fhosgladh às ùr gu foirmeil an dèidh obair ùrachaidh air.
Thuirt Comhairle na Gàidhealtachd gun deach am plàc a thoirt air falbh bho far an robh e faisg air doras an togalaich Diciadain agus a chur ann an stòr.
'S e Iarla Inbhir Nis fear de na tiotalan a thug an Rìgh bho a bhràthair san Dàmhair.
Chaidh a chur an greim fo amharas mì-ghiùlain ann an dreuchd phoblach na bu tràithe air a' mhìos seo.
Tha Anndra-Mountbatten Windsor a' dol às àicheadh na casaide sin.
Thugadh am plàc a chaidh fhoillseachadh ann an 2018 air falbh Diciadain
Tha comhairlean eile air a ràdh gum b' aithne dhaibhsan gu bheil plàcan sna sgìrean aca a' comharrachadh thursan Anndra Mountbatten-Windsor.
Tha Comhairle Dhùn Phrìs agus Gall-Ghàidhealaibh am measg na tha a' beachdachadh air dè a nì iad leotha.
Chaidh an seann phrionnsa a cheasnachadh aig stèisean a' phoilis ann an Norfolk mus deach a shaoradh fo rannsachadh.
Thuirt Poileas Thames Valley gun robh iad a' coimhead ri casaid gun tug e fiosrachadh dìomhair don eucoireach feise Jeffrey Epstein, nach maireann.
Tha e o thùs air a dhol gu làidir às àicheadh gun do rinn e càil ceàrr.
