Maoin Seasmhachd nan Gnothachasan Eileanach air a leudachadh

Chaidh sgeama taice do luchd-gnothaich Eileanach a th' air call fhulang ri linn trioblaidean le aiseagan fhosgladh gu eileanan a bharrachd.

Dh'fhoillsich Riaghaltas na h-Alba bho thùs aig àrd-choinneimh mu aiseagan a bh' aca ann an Uibhist sa Ghiblean gum biodh an stòras ann is cothrom air taic-airgid luach £4.4m.

Bha mì-thoileachas ann às dèidh sin ge-tà mun ùine a thug e an sgeama a chur gu dol agus nach robh e fosgailte an toiseach ach do luchd-gnothaich ann an cuid de dh'eileanan.

'S iad gnothachasan ann an Arainn, Beinn na Faoghla, Beàrnaraigh na Hearadh, Colbhasa, Èirisgeigh, Griomasaigh, Uibhist a Deas is Uibhist a Tuath a fhuair cothrom sa chiad phàirt den sgeama.

Bha gearanan ann gu sònraichte à Muile is Comataidh Aiseig Mhuile is Eilein Ì ag ràdh gun robh e "mì-chothromach".

Tha Riaghaltas na h-Alba a-nise air dearbhadh gun deach còrr is £1m a thoirt seachad gu seo is gu bheil iad a' leudachadh an sgeama gu eileanan eile.

Nam measg tha Barraigh, Bhatarsaigh, Colla, Diùra, Eilean Ì, Ìle, Muile, Tiriodh, is na h-Eileanan Tarsainn.

Tha an sgeama fosgailte a-nise chun na 12mh den Fhaoilleach.

Chuir Comataidh Aiseig Mhuile is Eilein Ì fàilte air an naidheachd.

Ann am brath air-loidhne thuirt iad le £1m air a phàigheadh à stòras £4.4m gu seo "gu bheil coltas ann nach e co-dhùnadh doirbh a bh' ann an sgeama a leudachadh".

'S e HIE a tha a' ruith an sgeama is gheibhear barrachd fiosrachaidh mu dheidhinn is cothrom feuchainn air taic an seo, taobh a-muigh.