Ceist mhòr mu mhaoineachadh Taigh-spadaidh Steòrnabhaigh

Leanaidh Comhairle nan Eilean Siar orra taic-airgid a chumail ri Taigh-spadaidh Steòrnabhaigh, ris a bheil iad an urra, airson bliadhna eile a dh'aindeoin nan sgaraidhean bheachd a nochd ann an deasbad mu dheidhinn.

Thuirt Ceannard na comhairle, Paul Steele, aig toiseach gnothaich: "'S e seo a' bhliadhna a dh'fheumas sinn cur romhainn a bheil sinn a' toirt taic dhan taigh-spadaidh no a' sguir dheth."

Chuala coinneamh de Chomataidh Poileasaidh agus an Stòrais Dimàirt nach robh maoineachadh goireas Steòrnabhaigh cothromach nuair nach robh seirbheisan sna h-eileanan eile a' faighinn taic na comhairle.

Ach chuala iad cuideachd rabhadh gum faodadh barrachd dhaoine a bhith a' spadadh aig an taigh nan cailleadh iad an goireas

Thuirt comhairliche Nis agus an Taobh Siar, Dòmhnall MacSuain: "Tha cunnart mòr ann gun caill sinn an ceangal ris an fhearann.

"Coltach ri ceist sealg a' ghuga - chan eil fhios aig daoine cò as a tha am biadh a' tighinn."

'S e Taigh-spadaidh Steòrnabhaigh an aon fhear am Breatainn a tha air a ruith le ùghdarras ionadail.

Chan eil na h-uimhir ga chleachdadh agus a b' àbhaist agus cosgaisean a' dol an-àirde a h-uile bliadhna agus cha do rinn an goireas prothaid sna beagan bhliadhnaichean a dh'fhalbh - le dùil ri call aig deireadh na bliadhna ionmhais seo de £10,000.

Dh'aontaich buill na comataidh £60,000 a thoirt dha bho theachd a-steach Oighreachd a' Chrùin airson na bliadhna ionmhais 2026/27.

Thuirt comhairliche Bharraigh is Bhatarsaigh, Coinneach MacIllEathain gun robh e "anfhoiseil" taic a thoirt do ghoireas Steòrnabhaigh gun an aon seirbheis a bhith aca aig deas.

Bha ceist air cuid de bhuill mu am bu chòir do shubsadaidh na comhairle leantainn nuair a tha an sporran cho gann, agus iad ag iarraidh gum bu chòir coimhead air dòighean eile seirbheisean spadaidh a ghlèidheadh san sgìre air fad.

Dh'aontaich comhairlichean gum beachdaich Buidheann Obrach an Taigh-spadaidh air mar as urrainn don chomhairle taic a chumail ri goireasan spadaidh ann an Uibhist is Barraigh.

Thuirt comhairliche Uibhist a Tuath, Mustapha Hocine, gum bu chòir co-dhùnadh mu mhaoineachadh Taigh-spadaidh Steòrnabhaigh san ùine-fhada a dhèanamh aig a' cheart àm 's a tha co-dhùnadh ga dhèanamh air seirbheisean do dh'Uibhist is Barraigh.