Dàil sia mìosan eile air an MV Glen Rosa

Bidh suas ri sia mìosan eile fhathast gus an tèid crìoch a chur air an obair togail air an MV Glen Rosa - an dàrna bàta-aiseig a thathas a' togail air Chluaidh do Chaledonian Mac a' Bhriuthainn.

Tha Gàrradh MhicFhearghais, a tha leis an riaghaltas, ag ràdh gun d' fhuaireadh meirg oirre ann an sgrùdadh bho chionn ghoirid agus gum bi aig an t-soitheach ri ùine a bharrachd a chur seachad san doca-thioram an ath-bhliadhna.

Ann an litir gu Buill-Phàrlamaid Albannach, taobh a-muigh thuirt iad gu bheil a-nis dùil aca gun tèid aca air a toirt do ChalMac sna trì mìosan mu dheireadh de 2026.

Tha CMAL, ris a bheil soithichean ChalMac an urra, cuideachd air innse gum bi dàil air an MV Isle of Islay, taobh a-muigh, a' chiad tè de na ceithir aiseagan aig CalMac a tha gan togail san Tuirc, agus nach bi i deiseil am-bliadhna.

Bha còir aig an MV Glen Rosa agus an MV Glen Sannox, a thogadh cuideachd am Port Ghlaschu, a bhith ann an seirbheis ann an 2018 ach dh'fhàg eas-aonta mu chosgaisean agus dealbhachadh nan soithichean gun deach a' chompanaidh ann an rianachd agus fo smachd na stàite.

Tha am MV Glen Rosa air a bhith ceangailte ris a' chidhe aig Gàrradh MhicFhearghais on chuireadh air bhog i bho chionn 20 mìos.

Dh'iarr àrd-oifigear na companaidh Graeme Thomson, a tha air a bhith san dreuchd bhon Chèitean, air na coimhearsnachdan air a bheil seo a' toirt buaidh an leisgeul a ghabhail.

Tha dùil gum foillsich iad am fiosrachadh as ùire mu na cosgaisean san Fhaoilleach.

Uile gu lèir, tha na chosg an dà bhàta air èirigh gu £460m, cha mhòr a cheithir uimhir a bharrachd air a' phrìs de £97m a chaidh aontachadh sa chùmhnant.

'S i an ath bhàta-aiseig ùr do chabhlach ChalMac an MV Isle of Islay, a' chiad tè de cheithir soithichean a tha gan togail aig Gàrradh Cemre san Tuirc.

Bidh i air slighe Ìle agus bha dùil gum biodh i deiseil san Dàmhair 2024 ach chaidh dàil a chur air an obair grunn thursan agus a' chompanaidh a' coireachadh dìth luchd-obrach agus trioblaidean sòlarachaidh.

Chaidh innse do chomataidh na còmhdhail aig Holyrood gun tèid sgrùdaidhean a bharrachd a dhèanamh oirre air a' 5mh den Fhaoilleach.

Bidh seòladh cola-deug aig an aiseag mus ruig i Alba agus bidh trèanadh a' chriutha agus deuchainnean mara a dhìth mus tòisich i ann an seirbheis.

Tha dùil gum bi na trì bàtaichean mòra ùra eile, do dh'Ìle, na Hearadh agus Uibhist a Tuath, air an toirt seachad le beàrn sia mìosan eatorra.