Cosgaisean càraidh aig CalMac a sìor èirigh

Tha CalMac ag ràdh gu bheil na cosgaisean càraidh air na bàtaichean aiseig aca air a dhol suas 70% ann an còig bliadhna.

Tha sin ri linn aois nam bàtaichean, agus dàil ann le bàtaichean ùra fhaighinn a-steach dhan lìonra.

Thuirt a' chompanaidh ron seo gun robh iad a' cur £5m a bharrachd ri obair chunbhalach air na bàtaichean aca, le iad sin gu bhith a' cosg ùine a bharrachd ann an doca-tioram ann an oidhirp dèanamh cinnteach nach bi iad a' briseadh cho tric.

Leis an treas cuid de na bàtaichean aig CalMac còrr air 30 bliadhna de dh'aois, thuirt iad gur e bàtaichean ùra fhaighinn an aon dòigh air an t-seirbheis a dhèanamh nas seasmhaiche.

Tha an MV Caledonian Isles cha mhòr 30 bliadhna de dh'aois agus tha i anns an doca-thioram an dràsta airson cola-deug.

Thèid còrr is £1m de dh'obair-càraidh a dhèanamh oirre agus bidh luchd-obrach aig Dales Marine Dry Dock ann an Grìanaig ag obair 18 uair san là fad na bliadhna 'son seirbheisean a thoirt seachad.

Mar as trice tha dùil gum mair bàta eadar 25 agus 30 bliadhna, ach tha bàtaichean ChalMac a nise anns a' chumantas 24 bliadhna de dh'aois agus mar sin feumach air ionmhas nas motha airson obair-càraidh riatanaich.

Thuirt Ceannard Cùisean Teicnigeach aig CalMac, Richard Colley, gum feum iad coimhead às dèidh nan seann bhàtaichean.

Uaireannan, thuirt e, tha duilgheadasan aca pàirtean fhaighinn a tha freagarach air an son, agus fiù 's aig amannan feumar pàirtean a dhèanamh a dh'aona-ghnothaich dhan t-soitheach.