Fianais mu bhàs Eilidh NicLeòid

Chuala rannsachadh Bomadh Arena Mhanchester fianais Diluain mu na h-uairean mu dheireadh aig Eilidh NicLeòid à Barraigh a chaidh a mharbhadh san ionnsaigh cheannairc ann an 2017.

Bha Eilidh a bha 14 aig an àm, am measg 22 duine a chaill am beatha nuair a chaidh ionnsaigh fhèin-mhairbhteach a thoirt air an Arena às dèidh ciuirm Ariana Grande.

Tha an rannsachadh aig an ìre far a bheilear a' cluinntinn mun chloinn is na h-inbhich a chaill am beatha anns an ionnsaigh - cò ris a bha iad coltach agus dè thachair riutha mus deach am marbhadh.

Bha pàrtantan Eilidh an làthair san èisteachd Diluain.

Chaidh aithris a sgrìobh màthair Eilidh, Marion, a leughadh agus i ag innse mu là na cuirme, agus mar a bha Eilidh a' coimhead air adhart gu mòr rithe.

Mhìnich Marion nuair a chuala i an spreadhadh an oidhche sin, mar a dh'atharraich a' bheatha aca uile gu tur.

Chuala an rannsachadh gun robh Eilidh dìreach ceithir meatairean air falbh bho Shalman Abedi nuair a spreadhadh e am boma.

Thuirt eòlaichean meadaigeach nach robh dòigh ann a bhiodh Eilidh air maireachdainn beò le na lotan a dh'fhuiling i.

Thuirt Cathraiche an Rannsachaidh, Sir Iain Saunders, gur e nighean a bh' ann an Eilidh a bha air cur gu mòr ri beatha chàich, agus gum faodadh i a bhith air rud sam bith a thogradh i a choileanadh.

Tha an rannsachadh a' leantainn.