Seirbheis mu dheireadh an Eaglais a' Chlachain

Bidh an t-seirbheis mu dheireadh ann an eaglais eachdraidheil air taobh siar Rois air an deireadh-sheachdain.

Chaidh Eaglais Pharaiste Loch Bhraoin sa Chlachan a thogail san 19mh linn, ach tha an togalach a-nis a' dol bhuaithe.

Tha Eaglais na h-Alba ag ràdh nach eil feum air tuilleadh.

Cuiridh iad an togalach air a' mhargaidh sa bhliadhna ùir.

Mura tèid a cheannach, dh'fhaodadh gun tèid am mullach a thoirt far an togalaich is inbhe tobhta sàbhailte a chur air.

Tha buidheann coimhearsnachd ùr air a bheil Caraidean Chlachan Loch Bhraoin an dòchas nach tachair sin.

Thuirt iad gu bheil iad an-dràsta ag ullachadh tagradh a chur chun na h-eaglaise.

Thuirt a' bhuidheann gur e làrach adhraidh a tha seo a tha a' dol air ais 1,000 bliadhna.

Tha iad airson an togalach a chur ann an làmhan nan daoine, is iad ag ràdh gur e goireas air leth a dh'fhaodadh a bhith ann dhan choimhearsnachd san fharsaingeachd, a bharrachd air a bhith na àite adhraidh.

Bidh an t-seirbheis mu dheireadh ann an Eaglais a' Chlachain Didòmhnaich aig 11:00m.