Neocov काय आहे? 'निओकोव्ह' व्हायरसविषयी जागतिक आरोग्य संघटनेनं म्हटलं...
फोटो स्रोत, Getty Images
वटवाघळांमध्ये आढळून येणाऱ्या कोरोना व्हायरसचा आणखी एक प्रकार मानवी शरिरात दाखल होऊ शकतो, अशी भीती चीनमधील काही शास्त्रज्ञांनी व्यक्त केली आहे.
यासंदर्भात PTI वृत्तसंस्थेने दिलेल्या बातमीनुसार, चीनमधील वुहान येथील शास्त्रज्ञांनी वरील शक्यता वर्तवली आहे. विशेष म्हणजे सध्या सुरु असलेल्या कोव्हिड साथीला कारणीभूत असलेल्या कोरोना व्हायरसचा प्रसार वुहान शहरातूनच झाला होता. वुहान या शहरातच चीनचं विषाणू संशोधन केंद्र आहे.
वुहानच्या चायनीज अॅकेडमी ऑफ सायन्सेस अँड वुहान युनिव्हर्सिटीमधील शास्त्रज्ञांनी म्हटलं की, निओकोव्ह (NeoCov) हा सध्या तरी दक्षिण आफ्रिकेतल्या काही वटवाघुळांमध्येच आढळत असून त्यांच्यातच पसरत आहे.
जागतिक आरोग्य संघटनेने काय म्हटलंय?
WHOने रशियन वृत्तसंस्था TASSशी बोलताना सांगितलंय की 'या व्हायरसची आम्हाला कल्पना आहे, पण याचा मानवाला खरंच किती धोका आहे, हे समजून घ्यायला आणखी अभ्यासाची गरज आहे.'
"मानवांना होणाऱ्या 75 टक्क्यांपेक्षा जास्त नवीन रोगांचे नवीन व्हायरस हे प्रामुख्याने जंगली प्राण्यामध्येच आढळतात. कोरोना व्हायरस तर बऱ्याचदा प्राण्यांमध्येच आढळतात, आणि वटवाघुळांमध्ये तर या विषाणूंचा नैसर्गिक खजिना असल्याचं आपल्याला माहिती आहेच."
दरम्यान, सर्वप्रथम कोरोना व्हायरसचा हा प्रकार 2013 मध्ये आढळून आला होता. Middle East Respiratory Syndrome (MERS) या आजाराशी संबंधित हा प्रकार असल्याचं BioXriv या जर्नलमध्ये सांगण्यात आलं आहे.
पण इतर संशोधकांनी अद्याप या अभ्यासाचं विश्लेषण आणि चिकित्सा केलेली नाही, त्यामुळे या व्हायरस प्रकाराबाबत स्पष्ट अशी माहिती अद्याप मिळू शकलेली नाही.
फोटो स्रोत, Getty Images
BioXriv मधील माहितीनुसार, जर या व्हायरसचे आणखी म्युटेशन झाले तर तो मानवासाठी घातक ठरू शकतो. हा व्हायरस दुसऱ्या वटवाघुळांमध्ये पसरायला वटवाघुळांमधल्या ACE 2 नावाच्या रिसेप्टर प्रोटीनचा आधार घेतो.
याचं म्युटेशन झालं तर हा व्हायरस मानवांमधल्या ACE 2 रिसेप्टर प्रोटीनलासुद्धा चिटकू शकतो, असं त्यांचं म्हणणं आहे.
पण शास्त्रज्ञांनी अशी भीती का व्यक्त केली, हा प्रश्न उपस्थित होतो.
फोटो स्रोत, Getty Images
सध्याचा Sars-CoV2 म्हणजे कोव्हिड-19चा कोरोना व्हायरस ज्या प्रकारे आतापर्यंत म्युटेट झालाय, खासकरून ओमिक्रॉनच्या बाबतीत, ते पाहता जर तसंच म्युटेशन या NeoCov कोरोना व्हायरसमध्ये झालं तर हा धोका उद्भवू शकतो.
पण असं खरंच शक्य आहे का? महाराष्ट्र कोव्हिड टास्क फोर्सचे सदस्य डॉ. शशांक जोशी यांनी याविषयी ट्विट करून माहिती दिली आहे.
त्यांच्या मते, "हा निओकोव्ह जुन्या MERS Covशी संबंधित आहे, DPP4 रिसेप्टर्सचा वापर करूनच पेशींमध्ये प्रवेश करू शकतो."
या लेखात सोशल मीडियावरील वेबसाईट्सवरचा मजकुराचा समावेश आहे. कुठलाही मजकूर अपलोड करण्यापूर्वी आम्ही तुमची परवानगी विचारतो. कारण संबंधित वेबसाईट कुकीज तसंच अन्य तंत्रज्ञान वापरतं. तुम्ही स्वीकारण्यापूर्वी सोशल मीडिया वेबसाईट्सची कुकीज तसंच गोपनीयतेसंदर्भातील धोरण वाचू शकता. हा मजकूर पाहण्यासाठी 'स्वीकारा आणि पुढे सुरू ठेवा'.
X पोस्ट समाप्त
"हा व्हायरस वटवाघळांमधले Ace2 रिसेप्टर्स वापरूनच संसर्ग पसरवू शकतो, पण म्युटेशन झाल्याशिवाय तो मानवामधले Ace 2 रिसप्टर वापरू शकत नाही," असं डॉ. जोशी यांनी स्पष्ट केलं आहे.
हेही वाचलंत का?
या लेखात सोशल मीडियावरील वेबसाईट्सवरचा मजकुराचा समावेश आहे. कुठलाही मजकूर अपलोड करण्यापूर्वी आम्ही तुमची परवानगी विचारतो. कारण संबंधित वेबसाईट कुकीज तसंच अन्य तंत्रज्ञान वापरतं. तुम्ही स्वीकारण्यापूर्वी सोशल मीडिया वेबसाईट्सची कुकीज तसंच गोपनीयतेसंदर्भातील धोरण वाचू शकता. हा मजकूर पाहण्यासाठी 'स्वीकारा आणि पुढे सुरू ठेवा'.
YouTube पोस्ट समाप्त
(बीबीसी न्यूज मराठीचे सर्व अपडेट्स मिळवण्यासाठी आम्हाला YouTube, Facebook, Instagram आणि Twitter वर नक्की फॉलो करा.
बीबीसी न्यूज मराठीच्या सगळ्या बातम्या तुम्ही Jio TV app वर पाहू शकता.
'सोपी गोष्ट' आणि '3 गोष्टी' हे मराठीतले बातम्यांचे पहिले पॉडकास्ट्स तुम्ही Gaana, Spotify, JioSaavn आणि Apple Podcasts इथे ऐकू शकता.)
