प्रिटोरियात या माऊलीने दिला 10 बाळांना जन्म
फोटो स्रोत, AFRICAN NEWS AGENCY (ANA)
एका माऊलीने दहा बाळांना एकाचवेळी जन्म देण्याची दुर्मीळ घटना समोर आली आहे.
दक्षिण आफ्रिकेतल्या प्रिटोरियात ही घटना घडली असून, काही दिवसांपूर्वीच एका मातेने नऊ बाळांना जन्म दिला होता. मात्र या माऊलीने दहा बाळांना जन्म देत नवा विक्रम केला आहे.
गोसिआम थामारा सिथोले या महिलेच्या नवऱ्याने सांगितलं की प्रसूतीपूर्व चाचणीत आठ मुलं असल्याचं दिसलं होतं. मात्र प्रत्यक्षात दहा मुलांना जन्म दिला आहे.
सात मुलं आणि तीन मुलींना या माऊलीने जन्म दिला आहे. भावुक करून टाकणारा क्षण आहे. मी आता फार काही बोलू शकत नाही असं या महिलेचे पार्टनर तेबोहो सोटेट्सी यांनी प्रिटोरिया न्यूजशी बोलताना सांगितलं.
37 वर्षीय सिथोले यांना याआधी जुळी मुलं आहेत, ती सहा वर्षांची आहेत.
सिझेरियन पद्धतीने त्यांच्यावर शस्त्रक्रिया करण्यात आली. सिथोले यांची प्रकृती स्थिर असल्याचं डॉक्टरांनी सांगितलं.
दक्षिण आफ्रिकेतील एका अधिकाऱ्याने दहा बाळांच्या जन्माला दुजोरा दिला मात्र एका अधिकाऱ्याने अजून दहा बाळांना पाहिलं नसल्याचं बीबीसीला सांगितलं. महिलेचे जे पार्टनर आहेत त्यांच्या दाव्याची बीबीसीने स्वतंत्ररीत्या पडताळणी केली नाही.
आम्ही यासंदर्भात शहानिशा करत असल्याचं गिनीज वर्ल्ड रेकॉर्ड्सने बीबीसीशी बोलताना सांगितलं.
2009 मध्ये अमेरिकेत आठ बाळांना जन्म दिला होता. एकाच वेळी सर्वाधिक बाळांना जन्म देण्याचा विक्रम या महिलेच्या नावावर आहे.
मात्र गेल्या महिन्यात 25 वर्षीय हलिमा सिस यांनी मालीत एकाचवेळी नऊ बाळांना जन्म दिला होता. मोरोक्को इथे असलेल्या हलिमा यांची प्रकृती स्थिर असल्याचं कळतं आहे.
एकाच वेळी अनेक बाळांना जन्म देणाऱ्या प्रसूती निर्धारित वेळेआधी होतात असं बीबीसीचे आरोग्य प्रतिनिधी ऱ्होडा ओढियांबो यांनी सांगितलं.
तीनपेक्षा अधिक मुलांना जन्म एकत्र होणं दुर्मीळ असतं. फर्टिलिर्टी अर्थात कृत्रिम पद्धतीने गर्भधारणा प्रक्रियेत असं होऊ शकतं. मात्र सिथोले यांना नैसर्गिकरीत्या एवढी मुलं झाली आहेत, असा दावा करण्यात आला आहे.
प्रार्थना करत आणि जागून काढलेल्या रात्री
महिनाभरापूर्वी सिथोले या प्रिटोरिया न्यूजशी बोलल्या होत्या. हे बाळंतपण आव्हानात्मक होतं. सगळ्या बाळांची प्रकृती चांगली असावी म्हणून मी प्रार्थना करत होतो. त्यांची तब्येत कशी असेल या विचाराने मी अनेक रात्री जागून काढल्या.
"गर्भाशयात इतकी सारी बाळं कशी सामावतील याची मला काळजी होती. ती सगळी सुरक्षित राहतील ना?" असे प्रश्न सिथोले यांना पडत असत. डॉक्टरांनी त्यांना धीर दिला. गर्भाशयाची वाढ होऊन ते मोठं झालं आहे असं डॉक्टरांनी सांगितलं.
फोटो स्रोत, Getty Images
एवढी मुलं गर्भाशयात असताना सिथोले यांचे पाय दुखत असत. दोन मुलं चुकीच्या गर्भाशयात असल्याचं डॉक्टरांच्या लक्षात आलं.
त्या समस्येचं डॉक्टरांनी निराकरण केलं. तेव्हापासून माझी तब्येत स्थिर आहे. माझ्या बाळांच्या आगमनासाठी मी अतिशय आतूर आहे असं सिथोले त्यावेळी म्हणाल्या.
या बाळांच्या आगमनाने सिथोले यांच्या पतीला प्रचंड आनंद झाला. ही देवाचा आशिर्वाद असलेली लेकरं आहेत असं त्यांनी सांगितलं. हा चमत्कार आहे.
याआधी दहा मुलांचा जन्म दोनदा झाला आहे. मात्र यापैकी कोणतीही मुलं फार काळ जगू शकली नाहीत.
हे वाचलंत का?
या लेखात सोशल मीडियावरील वेबसाईट्सवरचा मजकुराचा समावेश आहे. कुठलाही मजकूर अपलोड करण्यापूर्वी आम्ही तुमची परवानगी विचारतो. कारण संबंधित वेबसाईट कुकीज तसंच अन्य तंत्रज्ञान वापरतं. तुम्ही स्वीकारण्यापूर्वी सोशल मीडिया वेबसाईट्सची कुकीज तसंच गोपनीयतेसंदर्भातील धोरण वाचू शकता. हा मजकूर पाहण्यासाठी 'स्वीकारा आणि पुढे सुरू ठेवा'.
YouTube पोस्ट समाप्त
(बीबीसी न्यूज मराठीचे सर्व अपडेट्स मिळवण्यासाठी आम्हाला YouTube, Facebook, Instagram आणि Twitter वर नक्की फॉलो करा.
बीबीसी न्यूज मराठीच्या सगळ्या बातम्या तुम्ही Jio TV app वर पाहू शकता.
'सोपी गोष्ट' आणि '3 गोष्टी' हे मराठीतले बातम्यांचे पहिले पॉडकास्ट्स तुम्ही Gaana, Spotify, JioSaavn आणि Apple Podcasts इथे ऐकू शकता.)
