एकनाथ शिंदेंच्या हॉटेल रुममधला 'तो' संवाद व्हायरल

शिवसेना नेते एकनाथ शिंदे हे बंडखोर आमदारांसह आसामधील गुवाहाटीस्थित रेडिसन ब्ल्यू हॉटेलमध्ये थांबले आहेत. इथूनच एकनाथ शिंदे आपल्या भूमिका ट्विटरच्या माध्यमातून जाहीर करत आहेत.

विधिमंडळातील प्रतोद म्हणून आमदार सुनील प्रभू यांनी जारी केलेल्या पत्राला फेटाळत, याच हॉटेलमधून एकनाथ शिंदेंनी भूमिका जाहीर केली की, सुनील प्रभू आता प्रतोद राहिले नसून, नवे प्रतोद रायगडमधील महाडचे आमदार भरत गोगावले आहेत.

भरत गोगावलेंचा प्रतोद पदासाठीचा फॉर्म भरतानाचा व्हीडिओ आता समोर आला आहे. या व्हीडिओत आवाजही ऐकू येत आहे. यातून ठाण्यातील आमदार प्रताप सरनाईकांनी केलेलाल काही संवाद ऐकू येतो आणि त्यातून अनेक अर्थही निघतात.

प्रतोदपदाचा अर्ज भरतानाचा संवाद :

प्रताप सरनाईक - प्रतोदाचं काम काय माहित आहे ना? जबाबदारी वाढली तुमची. फार मोठी जबाबदारी तुमच्यावर आहे. शिवसेना पक्षाची जबाबदारी तुमच्यावर आहे. सर्व आमदारांनी व्यवस्थित टिकवून ठेवा. त्यांना बोलायला द्या.

प्रताप सरनाईक - मागच्या प्रतोदासारखं ( सुनील प्रभू ) नका करू...

प्रताप सरनाईक - मुंबईतल्याच लोकांना जास्त बोलायला द्यायचं.

(एवढ्यात रायगडमधील कर्जतचे आमदार महेंद्र थोरवे तिथं येतात...)

प्रताप सरनाईक - या.. हे आता प्रतोद आहेत. कुणाला पक्षात ठेवायचं, कुणाला काढायचं..

महेंद्र थोरवे - तुम्ही ठरवा...

प्रताप सरनाईक - नाही, यांना (भरत गोगावले) अधिकार दिलेले आहेत. सुनील प्रभूपासून सुरुवात करणार आहेत.

हा सर्व संवाद सुरू असताना एकनाथ शिंदे, संजय शिरसाट, बच्चू कडू हेही उपस्थित होते.

एकनाथ शिंदेंचं बंड

शिवसेनेचे वरिष्ठ नेते आणि कॅबिनेट मंत्री एकनाथ शिंदे यांनी बंड करून महाराष्ट्राच्या राजकीय वर्तुळात एकच खळबळ उडवून दिलीय. एकनाथ शिंदे हे कट्टर शिवसैनिक मानले जातात. मात्र, त्यांच्याच बंडामुळे शिवसेना पक्षात गोंधळाचं वातावरण निर्माण झालंय.

एकनाथ शिंदेंचा ठाणे जिल्ह्यातल्या राजकारणात दबदबा आहे. किंबहुना, ठाण्यातील शिवसेना म्हणजेच एकनाथ शिंदे असं समीकरण जवळपास तयार झालंय. त्यामुळे या बंडांच्या बातमीमुळे अनेकांच्या भुवया उंचावल्या.

आधी राज्यसभेच्या निवडणुकीत आणि नंतर विधान परिषदेत महाविकास आघाडीला मिळालेल्या धक्क्यानंतर सावरण्याचा वेळ मिळतो न मिळतो तोच एकनाथ शिंदेंचा फोन नॉट रिचेबल आला.

सकाळ उजाडयाच्या आत बातम्या पसरल्या की एकनाथ शिंदे सुरतमध्ये आहे. त्यांच्यासोबत 11 आमदार आहेत. मुख्यमंत्री उद्धव ठाकरे यांनी दुपारी 12 वाजता वर्षा बंगल्यावर आमदारांची बैठक ठेवलेली असतानाच एकनाथ शिंदेंनी उद्धव ठाकरेंच्या मनसुब्यांचे तीन तेरा वाजवले.

पुन्हा बातम्या येऊ लागल्या की एकनाथ शिंदेंसोबत 11 नाही तर 20 हून अधिक आमदार आहेत नंतर तो आकडा 30 च्या पार गेला. सुरतहून शिंदे आणि त्यांचे समर्थक आमदार गुवाहाटीत पोहोचले. तिथे पोहोचल्यावर एकनाथ शिंदेंनी आणखी एक धक्का दिला. ते म्हणाले, आमच्यासोबत 31 नाही तर 40-41 आमदार आहेत.

'एकनाथ शिंदेंना भाजपकडून उपमुख्यमंत्रिपदाची ऑफर'

भाजपने एकनाथ शिंदे यांना उपमुख्यमंत्रिपदाची ऑफर दिली आहे, असं एकनाथ शिंदेंच्या अत्यंत जवळच्या सूत्रांनी बीबीसी मराठीचे प्रतिनिधी मयांक भागवत यांना सांगितलं आहे.

त्यात एकनाथ शिंदे यांनी ट्वीट करून 4 मागण्या मांडल्या आहेत.

1.गेल्या अडीच वर्षात म.वि.आ. सरकारचा फायदा फक्त घटक पक्षांना झाला आणि शिवसैनिक भरडला गेला.

2.घटक पक्ष मजबूत होत असताना शिवसैनिकांचे - शिवसेनेचे मात्र पद्धतशीर खच्चीकरण होत आहे.

3.पक्ष आणि शिवसैनिक टिकविण्यासाठी अनैसर्गिक आघाडीतून बाहेर पडणे अत्यावश्यक.

4.महाराष्ट्रहितासाठी आता निर्णय घेणे गरजेचे.

तर शिवसेनेकडे केलेल्या मागण्या जर मान्य झाल्या नाही तर आम्ही भाजपबरोबर सरकार बनवायला तयार आहोत, असंसुद्धा या सूत्रांनी सांगितलं आहे. भाजपची मंडळ एकनाथ शिंदेंच्या सतत संपर्कात आहे असल्याचं सूत्रांनी मान्य केलं आहे.

गुवाहाटीतून एकनाथ शिंदे यांचा बुधवारी सकाळी उद्धव ठाकरेंशी संपर्क झाला आहे. तूर्तास तरी आम्ही पक्ष सोडणार नाही. पण आम्ही काँग्रेस आणि राष्ट्रवादी काँग्रेसबरोबर जाणार नाही, असं शिंदेंच्या गोटातून सांगण्यात आलं आहे.

उद्धव ठाकरेंना भेटायला जाण्याचा निर्णय सगळ्या आमदारांचा असेल. सगळे एकत्र येऊन निर्णय घेतील उद्धव ठाकरे यांना भेटायचं की नाही, असंसुद्धा या सूत्रांनी बीबीसीला सांगितलं आहे. पण सध्यातरी तसा काही निर्णय झालेला नाही.

एकनाथ शिंदे यांनी वेळेवेळी उद्धव ठाकरे यांच्याकडे नाराजी व्यक्त केली होती. त्यांच्या व्यथा मांडल्या होत्या पण त्यावर काहीच तोडगा काढण्यात आला नाही, म्हणू एकनाथ शिंदेंनी हे पाऊल उचलल्याचं त्यांच्या निकटवर्तींयांचं म्हणणं आहे.

ग्रामीण भागात शिवसेना खूपच कमकुवत आहे, शिवसेनेच्या आमदारांना निधी मिळत नाहीये. सरकराच्या कामांच श्रेय मिळत नाहीये, यामुळे आमदारांमध्ये खदखद आहे. जी एकनाथ शिंदे यांनी उद्धव ठाकरे यांच्या कानावर घातली होती, पण त्यातून पुढे काहीच निष्पन्न झालं नाही, असा दावा या सूत्रांनी बीबीसी मराठीशी बोलताना केला आहे.

ही वाचलंत का?

(बीबीसी न्यूज मराठीचे सर्व अपडेट्स मिळवण्यासाठी आम्हाला YouTube, Facebook, Instagram आणि Twitter वर नक्की फॉलो करा.

बीबीसी न्यूज मराठीच्या सगळ्या बातम्या तुम्ही Jio TV app वर पाहू शकता.

'सोपी गोष्ट' आणि '3 गोष्टी' हे मराठीतले बातम्यांचे पहिले पॉडकास्ट्स तुम्ही Gaana, Spotify, JioSaavn आणि Apple Podcasts इथे ऐकू शकता.)