कोरोना अनलॉक : राज्यांतर्गत वाहतुकीवर कोणतीही बंधनं लादू नका- केंद्राची स्पष्ट सूचना

देशात सध्या अनलॉक- 3 च्या टप्प्यामध्ये अनेक राज्यांमध्ये अजूनही प्रवासी आणि माल वाहतुकीवर निर्बंध आहेत. महाराष्ट्रामध्येही अजून एका जिल्ह्यामधून दुसऱ्या जिल्ह्यात जायला ई-पास गरजेचा आहे. पण राज्यांनी प्रवासी आणि मालाची वाहतूक कोणत्याही निर्बंधांशिवाय होऊ द्यावी असं गृहखात्याने म्हटलंय.

राज्यांतर्गत किंवा दोन राज्यांमधल्या प्रवासी आणि माल वाहतुकीवरचे निर्बंध केंद्राने उठवले असताना अशा प्रकारची बंदी जिल्हा वा राज्य प्रशासनाने घालणं हे गृहखात्याच्या सूचनांचं उल्लंघन असल्याचं गृह सचिव अजय भल्ला यांनी म्हटलंय.

गृह सचिव अजय भल्ला यांनी राज्यांच्या मुख्य सचिवांना एक पत्र लिहिलं आहे.

विविध जिल्हे वा राज्यांनी निर्बंध लावले असल्याच्या तक्रारी आपल्याकडे आल्या असून या निर्बंधांमुळे दोन राज्यांमधल्या वस्तूंच्या पुरवठा साखळीमध्ये अडथळे येत असल्याचं या पत्रात म्हटलंय.

राज्यांतर्गत वा दोन राज्यांमधल्या व्यक्ती, वस्तू आणि सेवांच्या वाहतुकीवर कोणत्याही प्रकारचे निर्बंध लावण्यात येऊ नयेत असं या पत्रात म्हटलंय.

देशात आणि महाराष्ट्रात सध्या अनलॉक -3 चा टप्पा सुरू आहे. देशभरातल्या कंटन्मेंट झोन्समध्ये 31 ऑगस्टपर्यंत लॉकडाऊन सुरू राहणार आहे. याच अनलॉकच्या प्रक्रियेत एक महत्त्वाचं पाऊल टाकत महाराष्ट्र सरकारने 19 ऑगस्टला राज्यातली एस.टी. सेवा पुन्हा सुरू करण्याची घोषणा केली.

यासाठी कोणत्याही पास वा परवानगीची गरज नसेल. एसटी महामंडळातर्फे स्टॅंडर्ड ऑपरेटिंग प्रोसिजर जाहीर करण्यात येईल. त्यानुसारच पूर्ण प्रवास होणार आहे.

या अनलॉक - 3 मध्ये रात्रीच्या संचारबंदीत माणसांच्या येण्या-जाण्यावरचे निर्बंध हटवण्यात आले आहेत. पण शाळा, महाविद्यालयं 31 ऑगस्टपर्यंत बंद राहणार आहेत.

कोरोना व्हायरसमुळे देशात यावर्षीच्या मार्च महिन्यात देशात संपूर्ण लॉकडाऊन जाहीर करण्यात आलं होतं. या लॉकडाऊनमधून बाहेर पडण्यासाठी आता अनलॉकची प्रक्रिया सुरू झाली आहे.

महाराष्ट्रात मॉल सुरू, फूड कोर्टवर बंदी

महाराष्ट्रात हा लॉकडाऊन - 7 म्हणजेच अनलॉक - 3 आहे. याला 'मिशन बिगीन अगेन' असंही शासनाच्या आदेशात म्हटलं आहे. गेल्या लॉकडाऊनसंदर्भातील काही नियम आणि अटी या लॉकडाऊनमध्येही कायम राहणार आहेत.

राज्य सरकारने लॉकडाऊन 31 ऑगस्टपर्यंत वाढवण्याचा निर्णय घेतला आहे. मात्र, काही नियम शिथील करण्यात आले आहेत. राज्यात मॉल आणि मार्केट कॉम्प्लेक्स उघडायला परवानगी देण्यात आली आहे.

5 ऑगस्टपासून सकाळी 9 ते संध्याकाळी 7 वाजेपर्यंत मॉल सुरू ठेवता येतील. मात्र, मॉल्समधील चित्रपटगृहं आणि फूड कोर्ट, रेस्टॉरंट्स सुरू करता येणार नाही. फक्त सगळ्या नियमांचं पालन करून फुड डिलिव्हरी या रेस्टॉरंट्समधून करता येईल.

मद्यविक्रीवर बंदी कायम असून मद्यविक्रीच्या केवळ होम डिलिव्हरी करण्याला परवानगी आहे.

या नियमांमधून सलून सुरू करण्याला पूर्वीच सूट मिळाली होती. मात्र, सलून सुरू करण्याला सशर्त परवानगी देण्यात आल्याचं मुंबईचे पालकमंत्री अस्लम शेख यांनी स्पष्ट केलंय.

या टप्प्यात इनडोअर जिम, व्यायामशाळा बंदच राहणार आहेत. केवळ बाह्य (आऊटडोअर) जिम्नॅस्टिक्सना सुरक्षित अंतर आणि स्वच्छतेचे नियम पाळून 5 ऑगस्टपासून सुरू ठेवण्यास मान्यता देण्यात आली आहे, असं राज्य शासनाने स्पष्ट केलंय.

कंटेनमेंट झोनमध्ये बंदीच

कंटेनमेंट झोनमध्ये 31 ऑगस्टपर्यंत कडक नियम लागू असतील. कंटेनमेंट झोन कोणते आहेत यासंदर्भात जिल्हाधिकारी संबंधित जिल्ह्याच्या वेबसाईटवर माहिती देतील.

कोरोनाचा प्रादुर्भाव वाढू नये यासाठी कंटेनमेंट झोनमधील हालचालींवर प्रशासनाचं बारीक लक्ष असेल.

मुंबई, पुण्यासाठी कठोर नियम

मुंबईसह राज्यातल्या महत्त्वाच्या महानगरपालिकांच्या क्षेत्रात कोरोनावाढीचा दर चढा आहे. त्यामुळे मुंबई महानगरपालिकेसह महानगर प्रदेश क्षेत्रात केवळ अत्यावश्यक सेवेतील लोकांना कार्यालयात जाण्यासाठी दूरचा प्रवास करता येणार आहे. इतरांना जवळच्या बाजारात जाता येईल. पण, त्यापेक्षा फार दूर जाता येणार नाही.

पुणे, ठाणे या भागात कोरोनाचे रुग्ण वाढत असल्यामुळे या भागात स्वच्छता आणि सोशल डिस्टन्सिंग करण्याचे नियम कठोरपणे राबवले जाणार आहेत. तसंच, या शहरांमधल्या कंटेनमेंट झोनमध्ये लॉकडाऊनचे सर्व निर्बंध पूर्वीप्रमाणेच कायम राहतील.

पावसाळा सुरू असल्याने पावसाळ्यातली महत्त्वाची कामं करण्याला परवानगी आहे. कमी महत्त्वाच्या वस्तूंच्या खरेदीसाठी लांबच्या प्रवासावर अजूनही बंदीच आहे.

मुख्य बंधनं

लॉकडाऊनच्या या टप्प्यात कोणत्या गोष्टींवर बंधनं असतील आणि कोणत्या गोष्टींसाठी सवलती मिळतील?

सोशल डिस्टन्सिंगचे नियम पाळा

 'वर्क फ्रॉम होम' करा

कोणत्या गोष्टी बंद राहतील?

हे वाचलंत का?

(बीबीसी मराठीचे सर्व अपडेट्स मिळवण्यासाठी तुम्ही आम्हाला फेसबुक, इन्स्टाग्राम, यूट्यूब, ट्विटर वर फॉलो करू शकता.'बीबीसी विश्व' रोज संध्याकाळी 7 वाजता JioTV अॅप आणि यूट्यूबवर नक्की पाहा.)