Жапонияны каптаган тайфун. Сүрөт

Жамгыр жана катуу шамал Жапониянын чоң аймагын кучагына алды. "Хагибис" куюну 60 жылдан берки эң кыйраткыч мүнөздөгү табият кырсыгы болуп калышы мүмкүн деген кооптонуулар бар.

Кеминде 35 киши каза тапты. Дагы 17 кишинин дайыны табылбай жатат, деп жазды Kyodo News. Эн-эйч-кей коомдук телеканалы 30 киши көз жумганын кабарлады.

Тиба префектурасында шамалдын катуу эпкини менен аласалып кеткен унаадан бир кишинин сөөгү табылды.

Жер көчкү жана суу ташкыны болушу мүмкүн деген кооптонуудан улам, 7 млн. чамалуу киши үйлөрүнөн убактылуу көчүрүлдү.

Дем алыш күндөрү шамалдын ылдамдыгы 225 км/с. чейин жетти.

Бийлик 1958-жылдан кийинки эң кыйраткыч мүнөздөгү тайфун болуп калышы мүмкүн деп чочулап жатат. Анда "Каногава" тайфуну 1200 кишинин өмүрүн алган.

Токио кырсыктын очогунда болгону менен башка суу каптаган шаар, кыштактарга салыштырмалуу катуу жабыр тарткан жок. Жапония борборунун суу ташкынына каршы уникалдуу системасы болгону үчүн көп жабыркаган эмес. Миллиарддаган каражат коротуп, татаал өтмөктөрдү, түтүктөрдү куруп чыгышкан. Башка шаарлардын мындай даярдыгы болбой калды.

Поезд кыймылдары жана миңдеген авиакаттамдар токтотулду.

Эн-эйч-кей кабарлагандай, 270 миңдей үй электр жарыгы жок калды. Айрым учурларда техникалык кызматтар дароо электр жарыгын калыбына келтирүүдө.

Ишемби күндөрү бир катар эл аралык спорттук мелдештер жылдырылды. Токио тургундарына мүмкүн болушунча үйдө олтургула деп, кеңеш берип жатышат.

*