Ụmụ m nwaanyị atọ ndị na-akwado ịlụ di nwụrụ n'ihe ọdachị ụgbọmmiri kwara a

Otu onye gbalahụrụ ọnwụ na ihe mberede ụgbọmmiri tara isi mmadụ 106 na mmiri River Nigera akọrọọla BBC etu ọtụtụ ọtụtụ ụmụnwaanyị ọkachasị ndị nne siri nwụọ dịka ha nọ na-agba mbọ ịgbapụta ụmụ ha oge ihe ọdachi a mere.

A ka na-eme nnyocha ima ihe kpatara isi ọdachị a kpọmkwem mana ndị uweojii kọwara na ihe ọdachi a mere ka akụkụ ụgbọ mmiri ahụ daturu nke mere mmiri ji malite iwubata n’ime ya bụ ụgbọ mmiri.

Ọnụọgụgụ si n’aka ndị gbara mbọ ịgbapụta ndị mmadụ ahụ kwuru na a gbapụtara mmadụ 114 ụbọchị ihe a mere na Mọnde.

Cheta na Igwe na-achị mpaghara ahụ bụ Emir nke Patigi bụ Ibrahim Umar Bologi II kwuru ha na-eche na mmiri riri ihe ruru mmadụ 150.

Ọ gwakwara ndị ntaakụkọ na ọ bụ ebilimmiri bụ ihe buuru ụgbọmmiri ahụ sọọ ya isi n’oke osisi nọ ebe ahụ nke mere ya bụ ụgbọmmiri jiri kpuo.

E kwuru na ụgbọmmiri ahụ bu mmadụ 300 na-eme njem maka agbaakwụkwọ si akụkụ Kwara steeti aga Niger steeti.

Nwaanyị ọzọ gbalahụkwara ọnwụ n’ọda a aha ya bụ Aisha Mohammed gwara BBC na ụmụ ya nwaanyị atọ ndị na-akwadozi ịlụ di nwụrụ n’ọdachị a.

Mohammed Alhassan onye lara na nta n’ihe ọdachi a gwara BBC na ọtụtụ ụmụnwaayị nwụrụ dịka ha nọ na-agba mbọ ịgbapụta ụmụ ha. O kwuru na nwwaanyị ya nwaanyị dị afọ asaa nwụrụ n’ihe ọdachị a.

Mohammed Sallihu bụ nwanne otu onye nwụrụ n’ihe a gwara ụlọ ntaakụkọ AFP na “Ihe a merenụ bụ ezigbo ihe mwute nke merela ka obodo anyị niile na-ama jijiji.”

Agbanyeghi na ndị obodo Patigi ebe ihe a mere na-eru ugbua, ndị mmadụ amalitekwala ime njem ụgbọmmiri ebe ahụ dịka ya bụ mmiri so n'ụzọ ndị mmadụ kacha esi aga mkpa ha.

Ihe gọọmentị Kwara steeti na-eme

Gọọmentị steeti a e zipụta ozi iti aka n’obi nye ezinaụlọ nakwa ndị ihe ọdachị a metụtara ma kwuo na a ga-aga n’ihu n’atụmatụ ịgbapụta ndị nwereike ị ka tọọ n’ime mmiri ahụ.

Nke a na-abịa dịka akụkọ kọwara na ụfọdụ ndị ka na-achọ ndị nke ha achọ n’ihe ọdachị a.

Gọvanọ AbdulRahman AbdulRazaq mere njem nleta gaa obodo ebe ndị ihe a metụtara n’ụbọchị Wenezde dịka o kwere ha nkwa inye ndị obodo ahụ onyinye uwe nchekwa maka mmiri iri mmadụ bụ ‘life jacket’ 1000 iji malite atụmatụ ọzụzụ nye ndị obodo ahụ maka ihe ọdachi mmiri nakwa mmiri iri mmadụ.

Gọvanọ AbdulRazaq kwukwara na onyela ụlọọrụ na-ahụ maka mmiri ndị gbara ha okirikiri bụ National Inland Waterways Authority iwu ka ha hibe usoro nchekwa tọrọ atụ maka ndị na-eme njem ebe ahụ.

Onyeisiala Bola Ahmed Tinubu zipụtakwara ozi kwuo na “akụkọ ihe a mere bụ ezigbo ihe mwute nye ya”.

“Ịmata na ndị ihe a metụtara bụ ndị nọ na-aga agbamakwụkwọ mere ya ọ jọgbuo onwe ya na njọ.”

Akụkọ ihe mberede ụgbọmmiri abụghị ihe ọhụrụ n’akụkụ steeti dịka ndị mmadụ na-ejikarị ụgbọmmiri eme njem n’ihi ọnọdụ ọjọọ ụzọ ndị nọ ebe ahu nakwa egwu ndị ntọ na-anọ ebe ahụ nke na-atọ ndị mmadụ maka ego mgbapụta.