Etu mba Indonesi si jiri mmanụ nri mepụta mmanụ e ji akwọ ụgbọelu

Mba Indonesia ejirila mmanụ nri mepụta mmanụ pụrụ ije e ji akwọ ụgbọelu, dịka mba ahụ na-eme nnyocha ịchọpụta ụdị mmanụ ndị ọzọ e nwereike iji na-eme ihe ma wetulata aka na mbubata mmanụ ụgbọala.

Ọ bụ ụlọọrụ 'Garuda Indonesia' ji mmanụ ahụ pụrụ iche e ji mmanụ nri mepụta kwọọ ụgbọala Boeing 737-800NG nke bu ndị njem 100 si Jakarta gaa Surakarta.

Ụlọọrụ mepụtara mmanụ ahụ pụrụ iche bụ ụlọọrụ 'Indonesia State Energy Firm PT Pertamina (PERTM.UL).

Ha ji akụrụngwa a kpọrọ hydro-processed esters' nakwa 'fatty acids', site n'usoro tekịnụzụ a kpọrọ HEFA iji mepụta mmanụ a pụrụ iche site n'akị.

Ụlọntaakụkọ Reuters kwuru na ụlọọrụ Garuda mere ọtụtụ nchọcha n'ọnwa Ọgọsta nakwa na mmalite ọnwa Ọktoba maka mmanụ a pụrụ iche ha mepụtara.

N'otu aka ahụ kwa, ụlọọrụ Pertamina kwuru na mmanụ ahụ ha ji mkpụrụ nkwụ mepụta na-ewetu mmepụta ikuku 'greenhouse gas', karịa mmanụ 'fossil fuel'.

Harris Yahya bụ otu n'ime ndị isi na ngalaba mmepụta mmanụ nke mba Indonesia kwuru na mmanụ 'biofuel' ga-ewetu mmetụta 'greenhouse' n'ụwa.

N'afọ 2021 ka Indonesia bu ụzọ jiri mmanụ a pụrụ iche e si na mkpụrụ nkwụ mepụta kwọọ ụgbọelu si n'obodo Bandung gaa Jakarta, mana ụgbọelu ahụ ebughi ndị njem.

Ndị ọ kacha mara kwuru na ngalaba njem ga achọ ihe ruru ijeri lita 450 nke mmanụ a pụrụ iche a kpọrọ 'Sustainable Aviation Fuel' (SAF) n'afọ 2050 iji nwee ike ịkwụsị iji mmanụ biofuel kpamkpam.

Mana ụfọdụ mba ndị ọzọ na-akatọkwa atụmatụ a dịka ha na-ekwu na mmepụta mmanụ a ebe o buru ibu ga-ebute igbutu ọtụtụ osisi nkwụ ma kpata ihe a na-akpọ 'deforestation'.

Otu European Union etinyela mmachi na mbubata mmanụ nkwụ. Ọzọkwa, kamgbe afọ 2022 ka Indonesia machiri mbupu mmanụ nri n'ụdị ọbụla.

Mmanụ ndị ọzọ a na-enyocha maka iji akwọ ụgbọelu

N'ime afọ 20 gara aga, nchọcha miri emi na-aga n'ihu iji mata etu e nwereike iji were mmanụ si n'ahụ ụmụ anụmanụ maọbụ nsị ụmụ anụmanụ iji mepụta ihe dị icheiche.

Nnyocha ọhụrụ gosiri na nke a abawanyela nke ukwuu n'ebe afọ 2006.

Ụfọdụ mmanụ e mepụtara n'ụzọ dị otu a ka e jiri kwọọ obere ụgbọala na nnukwu ụgbọala dị icheiche dịka 'truck', mana gọọmentị na-enye nkwado iji mara ma a ga-ejinwu mmanụ ndị a kwọọ ụgbọelu, iji mee ka njem elu dịwanye ọcha.

Dịka ngalaba na-ahụ maka njem na gburugburu na mba UK si kwuo, njem ụgbọelu ga-esi Paris gaa New York ga-ewe abụba si n'ahụ ọtụtụ ezi ọnụọgụgụ ha ga-eru 8,800.

Mana ngalaba ndị ọzọ na-eji mmanụ si n'ahụ ụmụ anụmanụ nakwa nsị ụmụ anụmanụ eme ihe dị icheiche na-ekwu na ọ bụrụ na ngalaba njem elu malite ịchọ mmanụ ụmụanụmanụ ndị a, ọ ga-emetụta ha nke ọma maka na ọ ga-eme ka ngwaọrụ ha kọọ ụkọ.