Nnamdi Okafor: Gọọmentị na ndị omeiwu Anambra Steeti akwaala arịrị maka ọnwụ onye otu ha

Gọvanọ Anambra Steeti bụ Chukwuma Soludo etiela ebewu maka ọnwụ Nnamdi Okafor bụ onye omeiwu na-anọchiteanya Awka South na steetị ha.

N’akwụkwọ odeakwụkwọ gọọmentị ha wepụtara, Soludo sị na Okafor bụ onye so n’ihe a na-eme n’ọgbakọ ndị omeiwu n’Anambra.

Ọ sị na ọ bụ obi mwute ka gọọmentị ya na ndị Anambra ji nabata ozi ọnwụ Okafor ma tie ezinaụlọ ya aka n’obi.

N’otu aka ahụ ndị ụlọomeiwu Anambra Steetị kwara arịrị maka ọnwụ onye otu ha a.

Onyeisi ndị omeiwu a bụ Uche Okafor sị na ọ bụ nke a wutere ha nke ukwuu maka na Okafor maara nke ekwe na-akụ.

Ọ kọwara ọnwụ ya dịka oke ihe funahụrụ ndị ụlọomeiwu nakwa gọọmentị Anambra Steetị.

N’aha ndị omeiwu niile, o tiri ezinaụlọ Nnamdi Okafor aka n’obi maka ọnwụ ya ma sị ka mkpụrụ obi ya laa na ndokwa.

Akụkọ kwuru na Okafor dara n’ala ma nwụọ n’ụlọọgwụ Sandton City dị na Johannesburg nke mba Saụt Afrịka.

Na nke a mere mgbe ọ gara ọzụzụ ndị ji ọkwa n’ụlọomeiwu Anambra Steeti bụ nke o so n’ime ha dịka ‘majority leader’.

A mabeghi kpọmkwem ihe butere ọnwụ Nnamdi Okafor.

Ọnwa Okafor na-abịa n'ime ọnwa atọ onye omeiwu ọzọ bụ Okechukwu Okoye nke Aguata Two nwụchara.

Ihe i kwesịrị ịma maka Nnamdi Okafor