What is 420 celebration: Lee ihe mere 420 jị bụrụ akara dị mkpa maka ndị na-ese 'marijuana'

Ị lee anya na soshal midia taa bụ ụbọchị 20 nke ọnwa Eprel, ị ga-ahụ na akara '420' na-efegharị, lee ihe kpatara nke a.

Dịka taa bụ ụbọchị 20 nke ọnwa anọ bụ nke ndepụta akara ya bụ 420, ọtụtụ mba dị ịcheịche na-eme ihe omenala ncheta ahịhịa marijuana nke anyị ma dịka igbó.

Ihe a malitere dịka ndị enyi ise na mba California maliter ịgbakọ ma o were nkeji iri abụọ gafee elekere anọ nke mgbede ụbọchị ọbụla, ma na-achọ ebe ha ga-ese 'marijuana'.

Aha mmadụ ise a bụ Steve Capper, Dave Reddix, Jeffrey Noel, Larry Schwartz, and Mark Gravich. Ha bụ ụmụakwụkwọ oge ha malitere ime nke a.

Cheta na ọtụtụ ndị nnyocha sayensị na-ekwu na ahịhịa 'marijuana' nwere ọtụtụ akụrụngwa na-edozi ahụ ma na-agwọ ọrịa n'ime ya.

Mana ọtụtụ mba ụwa dị icheiche machiri 'marijuana' dịka ọgwụ ike. Naịjirịa so na mba dị otu a.

Ugbua, dịka akara 420 na-efesa, ọtụtụ otu na-alụ ọgụ ikike dịrị mmadụ na mba dị iche iche jizị ụbọchị a eme ngagharị iji kpọkuo gọọmentị ka e bulie mmachị a machịrị ọgwụike marijuana na mba ha.

Emume 420 nke afọ a ga-adị n'obodo Denver nke dị na steeti Colorado na mba Amerịka.

Colorado bụ steeti mbụ na mba Amerịka buliri mmachị ise 'marijuana'

Ndị na-ese ihe osise hụtara nke a dịka nnukwu mmeri nyere mbọ ha na-agba ka ewepụ mmachị a machiri ise anwụrụ.

Ọ bụrụ na i na-ese maọbụ na etinye igbó na nrị, lee ihe dị mkpa ị kwesịrị ima.

Ihe Ị kwesịrị ima maka igbó [Marijuana]

Ahịhịa 'marijuana' maọbụ 'cannabis' nke e ji Igbó mara na Naịjirịa, so na otu n'ime ọgwụ ike nke gọọmentị Naịjirịa machiri amachi.

Mana nke a egbochighi ọtụtụ ndị mmadụ ịse ya, ọkachasị ndị ntorobịa.

Ọ bụ eziokwu na ndị nnyocha sayensị na-ekwu na ahịhịa 'marijuana' nwere uru ọ bara maka ahụike, mana o nwekwara ọtụtụ ọghọm nke mere gọọmentị ji machie ya.

Ihe ndị ọkammụta n'ihe gbasara ahụike kwuru gbasara 'marijuana':

Ahịhịa 'marijuana' nwereike inyere mmadụ aka n'ọtụtụ ụzọ ọkachasị ndị na-arịa ụfọdụ ọrịa.

Enyemaka a gụnyere: "Ibelata ahụ mgbu, ịbelata ọnọdụ ahụike na-emetụta ụbụrụ isi mmadụ maọbụ "multiple sclerosis" na Bekee, ibelata oke ịgbọ agbọ, ịkwụsịlata oke ụjọ na obi mmapụ, nakwa inyere ndị nwere ọrịa kansa aka."

Onye kwuru nke a bụ okammụta Makuochi Muobike, bụ ọkachamara n'ọgwụ nakwa ịmepụta ọgwụ.

Muobike gwara BBC Igbo na "'marijuana' nwere ike inye aka ka agụụ gụọ mmadụ, ọkachasị onye ahụ na-arịa".

O kwukwara na a na-eji ya enyere ndị nwere ihe Bekee na-akpọ "post-traumatic stress disorder" nakwa ọrịa parkinson' aka.

Dọkịta ọzọ aha ya bụ Udodi Okoli kwuru na 'marijuana' na-enyere ndị na-enwe nsogbu ihi ụra aka ka ha rarụ ụra nke ọma.

Kama ọ dọrọ aka na ntị na ọ bụ dọkịta kwesịrị ịgwa mmadụ ụzọ ka mma ọ ga-esi jiri 'marijuana' mee ihe, "ọ bụghị ihe mmadụ na-aṅụrụ onwe ya aghara aghara

"Agbanyeghi na 'marijuana' nwere ọtụtụ uru, ọ naghi abụ ọgwụ mbụ maọbụ nke abụọ a na-enye onye ọrịa n'ihi ọghọm dị n'ịṅụfe ya oke,"dọkịta Okoli kwuru.

Kedụ ọghọm dị na mmadụ ịse Igbó maọbụ itinye ya na nri?

Ahụmihe ụfọdụ ndị na-ese igbó

Otu nwoke na-achọghị ka akpọ aha ya kwuru na ịse Igbo na-enyere ya aka n'ikpalite mmụọ ya nakwa na-iralarụ ụra nke ọma.

Otu nwaanyị na-achọghị ka akpọ aha ya kwuru na enyochapụtara ọgwụike a n'ahụ ya n'ụlọọrụ ya, nke mere e ji chụọ ya n'ọrụ n'ihi na ọ bụ ihe ụlọọrụ ha machiri amachi.

Onye ọzọkwa sị ka a kpọọ ya John kwuru na Igbo na-enyere ya aka ịkpalite agụụ iri nri n'ihi na ọ naghi enwe mmasi rie nri. John kwukwara na "Igbo na-enyere m aka n'ịchepụta echiche ọma n'ọrụ aka dịka onye ọkwa nka."

Nwaokorobịa ọzọ kwuru na ọ na ese Igbo iji bụ ihe na-enyere ya aka imesapụ ahụ n'ihi na ọ bụ onye ihere. O kwukwara na ụtọ Igbo abaala ya n'ụmị nke bụ na ọ ga-esiri ya ike ịkwụsị. Nke a ebuterela ya na ndị ezinụlọ ya nsogbu n'ihi na nne ya achọghị ka ọ na-ese ya.

Ihe iwu Naịjirịa kwuru banyere Igbo?

Ngalaba NDLEA bụ ndị na-ahụ maka mgbochi ịṅụ na ibughari ọgwụ ike bekee kpọrọ 'narcotics' na Naịjirịa.

Ntaramahụhụ dịịrị onye a hụrụ ọgwụ ike dịka 'marijuana' n'aka ya bụ na onye ahụ ga-aga mkpọrọ ihe dịka afọ iri na abụọ.

Ọ bụrụ na ọgwụ a hụrụ n'aka onye ahụ buru ibu, o nwereike ịga nga mkpụrụ ọka.

Ọ bụ ezie na ọtụtụ mmadụ na mba ofesi na-agba mbọ ka a kagbuo mmachị 'marijuana', gọọmentị Naịjirịa ka kwusoro ike na ya bụ ahịhịa megidere iwu.

Onye ụtọ ịṅụ 'Marijuana' banyere n'akara, enwere ike ịgwọ onye ahụ?

Agbanyeghi na ụfọdụ ndị ahụike ka na-eme ndọrọndọrọ ma ọgwụ a enwereike ịtọ kụrụ mmadụ tọfee ya uche, ọtụtụ akwụkwọ ahụike agbaala ama na ụtọ ọgwụ a nwereike ịba mmadụ n'akwara nke bụ na onye ahụ aghaghị enwe ike kwụsị ịṅụ ya maọbụ see ya.

Onye nọ n'ọnọdụ a nwereike ịnata ọgwụgwụ site n'aka ndị ọrụ ahụike na-ahu maka akparamagwa.

E nwere ụfọdụ usoro ọgwụgwọ a na-eji enyere ndị a aka nke gụnyere:

Ha niile nakwa ndị ọzọ bụ usoro eji azọpụta ndị ịse ọgwụ a na-eme ịwa.

Marakwa na onye nọ n'ọnọdụ a abụghị onye e kwesịrị ịchị ọchị maọbụ kwaa emo, kama ọ bụ onye e kwesịrị iji ịhụnanya na ọmịiko nyere aka.

Lekwa ụfọdụ ihe onye nwere mmasị ibelata ise maọbụ ịkwụsị ise ọgwụ a ga-eme: