Nnamdi Kanu agaghị anọgide n'aka ndị DSS ụwatụwa - Fr Mbaka

Kanu na Mbaka

Ebe foto si, Getty Images

Ụkọchukwu na-ahụ maka ụlọ ekpere 'Adoration' dị n'Enugwu, bụ Ejike Mbaka, ekwuola na ihe ekwesiri ị na-ekwu maka ya bụ etu a ga-esi tọhapụ Nnamdi Kanu ọ bụghị maka atụmatụ "sit-at-home".

Mbaka kwuru nke a n'ụlọ ụka ya ma tinyekwe okwu ahu n'akara Facebook ụlọ ụka ahụ.

Ọ sị na ya na-ekpe ekpere ka uche Onyeisiala Naịjirịa bụ Muhammadu Buhari gbanwee n'ebe Maazị Kanu nọ.

Ọ gakwara n'ihu kwuo na Kanu agaghị anọ n'aka ndị nchekwa Bekee kpọrọ "Department of State Services" (DSS) ruo mgbe ebighegbi.

Mbaka sị na ya kwuru nke a maka na "dịka ọ dị taa, Kanu bu otu onye na-ekwu okwu ndị ntoroọbịa Igbo niile a sị isee".

Ọ sị na atọhapụ Nnamdi Kanu "sit-at-home akwụsị ozugbo".

Ọ jụrụ ihe mere ndị ochịchi mpaghara Ọwụwa Anyanwụ kwesiri ị na-ekwu maka "nwa ha" anaghị eme etu ahụ.

Ọ jụkwara sị: "Mmadụ sị na nwa gi bụ ajọ mmadụ, na a ga-egbu ya, ị ga-ebinye aka n'akwụkwọ ka e gbuo nwa gị?"

Skip Akachasị Gụọ and continue reading
Akachasị Gụọ

End of Akachasị Gụọ

Aha onyonyo, Father Ejike Mbaka na ihe ndị ị maghị maka ya

Mbaka sị na ya na-achọ otu n'ime nwa atụrụ ya na-efu dịka "akwụkwọ nsọ" siri kwuo.

Ọ gakwara n'ihu kwuo na ndị ọchịchị ekwesịghị iji maka ihe ha ga-erite gbahapụ nwa ya.

Mbaka rụtụru aka n'ogbugbu o kwuru na ndị ọrụ nchekwa na-egbu ndị ntorobịa n'Ọwụwa anyanwụ.

O kwuru na ọ ka mma na a rụrụ ụlo mkpọrọ ọhụru kpọrọ ndị mmadụ na-etinye ebe ahụ karịa igbu ha.

"Ndi Ipob anaghị eji egbe maọbu mma," Mbaka na-ekwu.

"Ọ uwe ha ka ha ji aga. Ha na-eyi uwe "rising sun".

Aha onyonyo, 'Amụma Fada Mbaka buru maka Hope Uzodinma n'Imo na-eme ihere'

Chukwu ga-egosi Buhari ụzọ ọ ga-esi."

Mbaka

Mbaka sị na ọ dị mkpa ka Onyeisiala Buhari kpee ekpere banyere ihe na-eme ugbua, ka Chukwu nye ya amamihe ọ ga-eje kpezie nsogbu niile chere Naịjirịa n'ihu.

Ọ sị na nke a bụ makana "onye o ji abụghị obere mmadụ.

"Ọ bụru na n'ihi otu onye, onweghi onye na-aga ọrụ n'ala Igbo n'ụbọchị Mọnde, onye ahụ pụrụ iche."

Mbaka kagburu ogbugbu mmadụ ọkachasi ndi ntoroọbịa ma kwuo na nsogbu Naịjirịa bụ ihe a ga-akwụsịnwụ ma agbakpọọ kpaa ya ọfụma.

Aha onyonyo, Mbaka sị na Buhari abụghị nsogbu Naịjirịa

Cheta na Ụkọchukwu Mbaka so kwado ọchịchị Onyeisiala Buhari n'afo 2015 nakwa 2019 ma kwuo na ọ bụ onye nwereike ịgbanwe ọnọdụ Naịjirịa ka ọ ka mma.

Mana ugbua, ọ na-ekwuzi na gọọmentị ahụ anaghị eme ihe ha kwesiri ime.

Garba Shehu bụ otu n'ime ọnụ na-ekwuru Buhari kwuru na iwe Mbaka bụ maka na gọọmentị Buahri enyeghi ndị ọ kpọtara ọrụ.