Chimamanda Adichie: Ihụnanya na omiiko kọrọ ụkọ n'ụka na Naịjirịa
Ebe foto si, Chimamanda Adichie/Instagram
Naịjirịa bụ ebe ihe gbasara ụka na-echu ọtụtụ ndị mmadụ ụra, mana ịhụnanya tọrọ atọ nakwa obi ọmiko dịka ọ kọrọ ụkọ.
Nke a bụ ọkpụrụkpụ nghọta si n'akwụkwọ ozi ode akwụkwọ Chimamanda Adichie dere gbasara akwụkwọ ozi nke si n'aka onyeisi ụka Katọlik n'ụwa niile bụ Pope Francis.
N'ime akwụkwọ ozi a ọ kpọrọ 'Encyclical Fratelli Tutti ', Pope Francis oku ka ndị otu Kraịst jikọọ ọnụ "dịka otu ezinụlọ ebe mmadụ niile bụ nwanne".
N'itule akwụkwọ a Pope Francis dere, Chimamanda Adichie rụtụrụ aka n'ihe ụfọdụ na-emegasị n'ụka Katọlik na Naịjirịa, ọ kachasị site n'aka ụfọdụ ndị ụkọchukwu.
Nwaada Adichie kwuru na a mụrụ ya n'ụka Katọlik, ọ bụrụkwa onye ji Katọlik etu ọnụ, mana oge o tolitere, ọ malitere ịlaghachi azụ n'okwukwe n'ihi ụfọdụ ihe.
Lee ụfọdụ ihe ndị o metụrụ aka mere okwukwe ya ji mawa jijiji:
- Ịkwụsị di na nwunye ịnata oriri nsọ maka na nwa ha lụrụ onye ụka Anglịkan
- Ịjụ ili mmadụ n'ihi na o ji ụka ụgwọ nke onweghị ike ịkwụ tupu ọ nwụọ
- Ịmanye ụmụnwaanyị ka ha were akwa kpuchie aka ha na ubu ha n'ụlọụka "ka ha ghara itinye ụmụnwoke n'ọnwụnwa"
- Ịkatọ ụmụnwaanyị oge niile dịka a ga-asị na mmadụ ịbụ nwaanyị bụ ihe ọjọọ n'onwe ya
Ebe foto si, Chimamanda Adichie/Instagram
Chimamanda Adichie kọwakwara etu ụkọchukwu obodo ya si kpaso ezinụlọ ya agwa n'oge akwamozu nne na nna ha.
"Ọtụtụ ihe ka a gaara iji obi ọmịiko mee, mana emeghị ya. Ọtụtụ ohere pụtara iji gosi nkwanye ugwu, mana ejigh ohere ndị a mee ihe," Adichie dere.
Nwaada Adichie gara n'ihu kọwaa etu ụkọchukwu si malite ịkatọ ya maka ihe o dere n'oge gara aga gbasara ụka na Naịjirịa.
Nke a bụ n'agbanyeghị na ha ka na-eru uju nne ha bụ onye ha liri naanị nwa oge nta ka ha lichara nna ha.
Adichie kwuru sị: "Anaghị m akpọ onwe m onye ụka Katọlik, kama abụ m onye na-enweta nkasịobi n'usoro ofufe ndị ụka Katọlik."
"Ana m atụ anya ụka ebe ihụnanya ka mkpa karịa iti iwu nakwa idebe iwu."
"Ana m atụ anya ụka ebe a na-asọpụrụ ndị ụkọchukwu ọbụghị ịtụ ha egwu."
"Ana m atụ anya ụka ebe ndị nchekwa agaghị na-agbarụ ihu mgbe ọbụla na-akụ aka n'oche ndị mmadụ."
"Ụka ebe a na-elekọta ụmụaka nke ọma, ebe ụkọchukwu anaghị eti ndị na-agba odibo na 'altar' ihe." Dgz.
Ihe ndị mmadụ na-ekwu maka ihe Chimamanda dere
Dịka akwụkwọ ozi a Chimamanda Adichie dere pụtara na soshal midia, ọtụtụ malitere itinye ya ọnụ, tinyere ụfọdụ ụkọchukwu Katọlik.
Chidiebere Benneth, onye ụkọchukwu, kwuru sị: "Nke a bụ eziokwu ma bụrụkwa ihe anyị kwesịrị ịgba mbọ maka ya."
Omokugbo Ojeifo, onye ụkọchukwu ọzọ, kwukwara sị: "Ọrụ dịịrị anyị buru ibu. Olileanya m bụ na anyị ga-agba mbọ etu o kwesịrị."
Mana Fada Agbo, bụkwa onye ụkọchukwu, dere sị, "Ọ dịghị mma ka e were agwa ọjọọ ụfọdụ ndị ụkọchukwu na-akpa na-atụnyere ụka katọlik niile."
"Enwere ọtụtụ ụkọchukwu nakwa ọtụtụ ụlọụka ebe ihe ndị a Nwaada Adichie kwuru anaghị eme."
