Female Genital Mutilation: Abịa na Imo steeti enweghị iwu machiri ibi nwaanyị ugwu

N'afọ 2015, ndị omeiwu Naịjirịa binyere aka n'iwu a kpọrọ 'Violence Against Persons Prohibition Act', nke machiri omenala ndị na-emekpa mmadụ ahụ, dịka ibi nwaanyị ugwu.

Ọ dịzi n'aka ndị omeiwu steeti dị icheiche ibinye aka n'iwu a ka o wee dị ire na steeti ha.

Mana a bịa na mpaghara Ọwụwa Anyanwụ, naanị Abia na Imo steetị bụ ndị ebinyebeghị aka n'iwu a bụ 'Violence Against Persons Prohibition Act'.

Na Naịjirịa niile, naanị steeti iri na atọ binyerela aka n'iwu a.

Ha gụnyere: Anambra, Benue, Cross River, Ebonyi, Edo, Ekiti, Enugu, Kaduna, Lagos, Ogun, Osun, Oyo, na Plateau.

Mpaghara FCT, bụ isi obodo Naịjirịa, mere ha iri na anọ.

Ime aramara anakwaghị amasị m ma ncha - Nwaanyị e biri ugwu

Nwa Ibari (ọ bụghị ezigbo aha ya) alụọla di ma mụta ụmụ abụọ, mana ihe e mere mụta nwa, ya bụ aramara nke bekee kpọrọ 'sex', anaghị amasị ya chaachaa.

Nsori di na nwunye, nke bụ otu ihe na-ejikọ di na nwunye ọnụ, anaghị agụ Nwa Ibari agụụ.

Nke a bụ maka na e biri Nwa Ibari ugwu oge ọ bụ nwata, ma bechapụ akụkụ ọtụ ya nke bekee kpọrọ 'clitoris'.

'Clitoris' bụ akụkụ ọtụ nwaanyị nke kacha atọ ya ụtọ ma ọ na-eme aramara, mana ọ bụrụ na e bepụ ya oge a na-ebi nwaanyị ugwu, aramara nwere ike ịbụrụ ya ọgụ na mgba.

"Tupu mụ na di m amalite inwe mmekọ, ahụ ga na-atọ m rịrịrị, mana ngwangwa ọ banyere, naanị ụfụ ka ahụ niile ga na-afụ m," Nwa Ibari gwara onye ntaakụkọ BBC.

"Ugbua, m cheta mụ na di m inwe mmekọ, ọ na-amapụ m obi."

Otu 'World Health Organisation' kwuru na ụmụnwaanyị e biri ugwu n'ụwa karịrị nde narị abụọ (200 million).

Mana onweghị otu mkpụrụ uru ibi ugwu na-abara ụmụnwaanyị, naanị ọghọm jupụtara ya.

Ya mere ha ji wepụta ụbọchị isii nke ọnwa Febrụwarị kwa afọ dịka ụbọchị iji gbaa mbọ maka ịkwụsị ibi ugwu ụmụ nwaanyị.

Ọ gaara amasị m ma ọ bụrụ na e bighi m ugwu - Olaedo

Nwaanyị ọzọ, Olaedo (ọ bụghị ezigbo aha ya) kọọrọ BBC Igbo etu ibi ugwu si metụta ya.

Olaedo kwuru sị: "Ọtụtụ oge ka ndị enyi m na-ekwu etu aramara si atọba ha n'ụbụrụ, mana ọnaghị ekwe m nghọta."

"Mana na nke m, tupu mụ anụ ụtọ aramara, nwoke ọ bụ mụ na ya ga-enwe nnukwu ndidi ma were nwayọọ mara ebe o kwesịrị ịkpatụ aka."

Olaedo kwuru na ọ gaara akara ya mma ma ọ bụrụ na nne ya hapụrụ ya etu chi si kee ya, kama ibi ya ugwu.

"Onweghị ihe nwere ike ime ka m bie nwa m nwaanyị ugwu," Olaedo kwuru.

Mpaghara ebe ibi nwaanyị ugwu ka dị na Naịjirịa

Joseph Osuigwe bụ onyeisi otu Devatop Centre for Africa Development kwuru na ọ bụ na mpaghara Ọwụwa Anyanwụ nakwa Ọdịda Anyanwụ Naịjirịa ka ụdị ihe a na-emekarị na Naịjirịa.

Steeti dịka Ebonyi, mpaghara Okigwe na Mbano n'imo steeti, nakwa mpaghara ụfọdụ n'Abia steeti bụ ebe ọ ka njọ.

Ndị ọzọ bụ Ekiti, Ondo, na Osun.

Mana Osuigwe kwukwara na ya bụ ihe na-ebelata ugbua, mana ọ kwụsibeghị kpamkpam.

Gịnị mere e ji ebi ụmụnwaanyị ugwu?

Ọ dị ọtụtụ nkwenye n'omenala dị icheiche nke mere ibi ụmụnwaanyị ugwu ji aga n'ihu.Ha gụnyere:

Ọghọm dị n'ibi nwaanyị ugwu

Dịka WHO si depụta, ọghọm ibi nwaanyị ugwu gụnyere:

Iwu megidere ibi nwaanyị ugwu

E nwere nkwekọrịta dị icheiche machiri ibi nwaanyị ugwu, nke Naịjirịa so na mba binyere aka na ha.

Ha gụnyere: