Abia workers salary: Onweghi ngagharịiwe anyị chọrọ ime - Onyeisi NLC

Onyeisioche otu jikọtara ndị ọrụ n'Abia Steeti bụ Uchenna Obigwe ekwuola na onweghi mgbe ndị ọrụ ji chọ ime ngagharịiwe.

Obigwe gwara BBC Igbo na ọ bụ ịgba arụkwaghịm ka ha chọrọ ime ma ọ bụrụ na gọọmentị Abia agbaghị mbọ kwụọ ndị ọrụ ụgwọ.

Ọ sị na gọvanọ Okezie Ikpeazụ kpọrọ ndịisi ọrụ oku na Fraịde 16 Ọgọst, 2019, maka etu a ga-eji kwụọ ndị ọrụ ụgwọ bụ ebe ha nọ hiwe kọmitii ga-ahụ maka nke a.

O kwuru na ndị so na komitii a gụnyere ndị ọrụ gọọmentị nakwa ndịisi otu jikọtara ndị ọrụ bụ ndị edurula n'iyi ọrụ ugbua.

Obigwe gara n'ihu kwuo na e nyere ndị a ụbọchị iri anọ iji wepụta akụkọ ihe mere ma nye ya gọomentị Abia Steeti.

Ọ bụrụ na gọọmentị nyocha atụmatụ ndị kọmitii ahụ, a na-atụ anya na ha ga-amalite kwụwa ndị ọrụ ụgwọ.

Ọ gara n'ihu kwuo na onye ọbụla chọrọ ime ngagharịiwe na-eme ya na nke onwe ya "Ihe onye ahụ kotere ya e buru."

Obigwe sịrị na ihe bụ iwe ndị ọrụ bụ ụgwọ e ji ndị lara ezumike nka, ụgwọ e ji ndị nkuzi ụlọakwụkwọ Praịmarị na Sekọndịrị.

Ndị ọzọ bụ ụgwọ e ji ndị ngalaba ọrụ dị icheiche (Agencies) na ụgwọ mbuli n'ọrụ ndị ọrụ.

Mana otu onye ọrụ bekee n'Abia Steeti na-achọghị ka a kpọọ aha ya gwara BBC na ndị ọrụ nwere nkwekọrịta ime ngagharịiwe.

Gọọmentị Abia Steeti kwuru na ọ bụ ndị omekaome na-achọ ịhazi na ime ngaghrịiwe n'aha ndị ọrụ Bekee.

Kọmishịọna na-ahụ maka mgbasaozi bụ John Okiyi kwuru na ndị ọrụ nchekwa dị njikere ịnwụchi ndị dị otu a.

Cheta na akụkọ na-efegharị na soshal midia na-ekwu na ndị ọrụ n'Abia Steeti na-achọ ime ngagharịiwe maka ụgwọ gọọmentị ji ha.

Akụkọ ga-amasị gị: