Seasonal Fruits: Mkpụrụosisi ndị ị ga-eji tụọ ndụ gị mmanụ ugbua
Mkpụrụosisi bụ ihe mmadụ nwere ike iji tagharịa ọnụ maọbụ werekwa mere nri na-eju afọ.
Mgbe ụfọdụ, ndị mmadụ na-ewere mkpụrụosisi mepụta ihe ọṅụṅụ nke Bekee na-akpọ "juice" nakwa nke a kwọrọ akwọ a na-akpọ "smoothie".
Mana otu ihe ị ga-ama maka mkpụrụosisi bụ na ọ na-enwe oge, dịka otu ilu ndị Igbo na-ekwu na "ụkwa ruo oge ya ọ daa".
Etu a ka o si abụ ma oge mkpụrụosisi ruo; mgbe ahụ ka ọ na-aka acha ọfụma na-ekpughị ya akwa makwa kacha tọọ ụtọ.
Mkpụrụosisi ndị nke oge ha bụ ebe ọnwa Disemba na Jenụwarị
1) Ụdara:
Ụdara abụghị mkpụrụosisi ị ga-emetụ ọnụ ma ọ bụrụ na ọ bụghị oge ya, makana ọ ga-adị gị ka ebe e ji akantị marichaa gị anya.
Ọ na-aka mma ma ọ bụrụ na mmiri amatụla ya obere, maọbụ na o ji aka ya dapụ n'osisi kama ịghọtu ya tupu ị rachaa ya, mana ọ bụghị oge niile ka ọ na-eche mmiri tupu ọ tọọ ụtọ.
Nke na-atọ ụtọ, a na-akpọ ya "ụdara nwannu".
Ọ bụ mkpụrụosisi nwere egwu nke ya (ị ga-asị na ị maghị egwu "ụdara m too...ụdara m chaa, ụdara m daa...).
Ihe ọ na-enye n'ahụ:
- Ọ na-enye kalshịọm nke na-adị mma n'ọkpụkpụ nakwa eze.
- Ọ na-enye Vaịtamin C nakwa A.
- Ọ dị mma ịracha ya makana ọ naghị ebu mmadụ ibu.
- Ndị agadị (nwaanyị dị ime) anaghị eji ya egwu egwu
2) Akị awụsa:
N'agbanyeghị na akị awụsa na-epu n'Ugwu Awụsa, ọtụtụ ndị Igbo anaghị eji ya egwu egwu maka ụdịrị ụtọ ọ na-atọ.
A na-ata ya ka ụkwa achị n'aka, (makana a na-enwe nke kpọrọ akpọ na nke dị ndụ) mana ọ na-aka mma ibanye nke ịkpọ ahụ na mmiri ọkụ ka ọ kwe ọtịta.
Ebe foto si, Instagram/Utakaegbe
A na-akwọ ya akwọ eji emepụta ihe a na-akpọ "mmiri akị awụsa" maọbụ "tigernut milk" na Bekee.
Ihe ọ na-enye n'ahụ:
- Ndị ọkachamara n'ahụike na-ekwu na ọ na-enye aka akwalite agụụ mmekọrịta ahụ nwoke na nwaanyị
- Makana o nwere nnukwu ihe Bekee na-akpọ "fiber", ọ na-enye aka ime ka ịga mposi ghara ịra ahụ
- Ọ na-enye aka ịkutu shuga dị n'ọbara
3) Ube mgba/ube okpoko/Ube Okwe:
Ube mgba nke ndị Ugwu na-akpọ "atịlị" yiri ube nkịtị ahụ e ji ata ọka, mana o pekarịrị ya na mpe. Ọ na-ahakwa mmanụ karịa ube igbo.
Ebe mkpụrụ ube igbo anaghị ara ahụ agbawa, a na-ejinwu mkpụrụ ube mgba azụ nchọrọ.
A na-esi ya n'ọkụ ka o ruo tupu a rachawa ya. Ụfọdụ na-etinye ya nnu tupu ha arachaa ya, mana ị ga-arachanwu ya etu ahụ.
Ọtụtụ ndị amaghị nke a, mana a ga-ejinwu mmanụ pụtara na ya esi nri, nke ndị ma maka ya na-ekwu na ọ ka mmanụ e ji esi nri mma ma a bịa n'ihe ọ na-enye n'ahụ nakwa ụtọ ọ na-enye nri.
Ihe ọ na-enye n'ahụ:
- Ndị ọnụ na-eru n'okwu maka mmanụ kwuru na mmanụ si na ya na-agwọnwu ọnya n'ahụ mmadụ
- Mmanụ ya na-adị mma n'izụ ntutu isi
- Ọ na-adịkwa mma n'anụ ahụ
4) Okpete:
Ọtụtụ ndị na-esi na ya ewepụta shuga ha na-aṅụ karịa nke arụpụtara arụpụta.
Ọ na-atọ bịrịbịrị nke ukwu, mere ndị Bekee ji akpọ ya "sugar cane".
A bịa na Naịjirịa, ọ na-epukarị n'Ugwu Awụsa.
A na-ebu ụzọ akpụchapụ azụ ya tupu a taa ya.
Ihe ọ na-enye n'ahụ:
- Otu dọkịnta gwara BBC Igbo n'ekwentị na ọ na-enye 'Glucose' na-ahụ.
- O kwukwara na nke na-enye nje dị n'ime ahụ ike ọrụ.
- Ọ na-enye anụ ime ahụ mmiri.
- O kwuru na ịta okpete ka mma karịa iri shụga arụpụtara maka ndị na-asọ shuga.
Dọkịnta Ikenna Emedike kwukwara na ọ dị mma ka ndị mmadụ na-eri mkpụrụosisi ndị a mgbe ọ bụ oge ha iji gbalahụ irite nje.
O kwukwara na ọ bụ oge mkpụrụosisi dị n'oge ya ka ọ na-aka enye ihe n'ahụ.
Akụkọ ndị ga-amasị gị:
