Sex change: A ga-agbatara ndị bụ nwoke na nwaanyị ọsọ enyemaka?

Ụfọdụ ndị nwere ihe e ji a bụ nwoke na nwaanyị na-eche ka nwunye onyeisiala Aisha Buhari, mezuo nkwa o kwere ịkwụrụ ha ụgwọ ha ga-eji awa ahụ ga-agbanwe ọnọdụ ha.

BBC bu ụzọ mee akụkọ otu nwoke bi na Kano nwere ihe e ji abụ nwoke nakwa nke nwaanyị nke Bekee kpọrọ 'genitals', mere ka oriakụ Buhari kwe nkwa na ọ ga-akwụrụ ndị ọzọ nọ n'ọnọdụ ahụ ụgwọ ahụ.

Nkwa enyemaka ahụ o kwere mere ka ọtụtụ ndị mmadụ pụta ikwuputa ọnọdụ ha, ọtụtụ n'ime ha bụ ndị si steeti ndị tere aka bịa.

Abdullahi Gunduwawa bụ onyeisioche ọrụ na-aga n'ụlọọgwụ Aminu Kano ahụ, gwara BBC na e nweela ndị ha wara ahụ.

Mana Gunduwawa kwuru na ha anụbeghị ukwere n'ebe nwunye onyeisiala maọbụ ndị na-arụrụ ya ọrụ nọ, kemgbe ha zigachara aha mmadụ 10 n'izu ole gara aga.

"Aha ikpeazụ anyị zigara bụ maka mmadụ 10 mana anyị anụbeghị ihe ọbụla n'aka ha, ndị chọrọ ka a waa ha ahụ na-enye anyị nsogbu n'ụlọọgwụ na-ajụ anyị 'kedụ kwanu?".

Dahiru Sule bụ otu onye n'ime ndị na-eche, ma rịọ ka nwunye onyeisiala nyere ha aka etu o si nyere ndị bu ha ụzọ.

"Nye anyị niile pụtara, ihe a bụ ọnọdụ igbanwe ndụ nye anyị, ka Hajiya Aisha nyere anyị aka kwụọ ụgwọ etu o si nyere ndị bu anyị ụzọ. Oge ọbụla anyị gara ụlọọgwụ, ha ga-asị anyị laa ma bịaghachite maka na nwunye onyeisiala ezitebeghi ego ọbụla."

BBC Pidgin kpọrọ Sulaiman Haruna bụ ọnụ na-ekwuchitere oriakụ Buhari, iji nụ ihe ji ha akwụbeghị ụgwọ ndị e zitere aha ha.

Akụkọ ndị ga-amasị gị: