Barcelona ta ɗauki Copa del Rey na 31 jimilla bayan cin Real Madrid

Barcelona ta lashe Copa del Rey na 31 jimilla, bayan doke Real Madrid 3-2 ranar Asabar a Estadio Olímpico da ke birnin Sevilla a Sifaniya.

Barcelona ta fara cin ƙwallo ta hannun Pedri a minti na 28 da take leda, kuma na biyu a Copa del Rey, sannan na farko tun bayan wadda ya zura a ragar Atletico Madrid cikin Fabrairu.

Daga baya Real Madrid ta farke ta hannun Kylian Mbappe a bugun tazara, saura minti 20 a tashi daga wasan na El Clasico.

Real ta kara na biyu ta hannun Aurelien Tchouameni, amma Barcelona ta farke ta hannun Ferran Torres, saura minti shida a tashi karawar.

Alkalin wasa ya bai wa Barcelona fenariti, bayan da Raul Asensio ya yi wa Raphinha keta a da'ira ta 18, daga baya aka soke bayan tuntuɓar VAR.

Haka suka tashi min 90 da ɗan karin lokaci suna 2-2, daga nan aka je karin lokacin minti 30, inda minti 15 ɗin farko sakamakon bai canja ba.

A mintin 15 na biyu ne a cikin karin lokaci, Barcelona ta kara na uku a raga ta hannun Jules Kounde, saura minti biyar a tashi fafatawar.

An bai wa Antonio Rudiger da kuma Lucas Vázquez jan kati a karawar ta manyan ƙungiyoyin Sifaniya.

Wasan karshe na takwas kenan da suka kara a Copa del Rey a tarihi, inda kowacce ta yi nasara lashe shi sau huɗu.

Wannan shi ne karo na uku da suka haɗu a gasa a kakar nan, inda Barcelona ta je ta doke Real Madrid 4-0 a La Liga a Santiago Bernabeu cikin Oktoban 2024.

Haka kuma dai Barcelona ta lashe Spanish Super Cup a kan Real Madrid da cin 5-2 a Saudiyya a cikin watan Janairun 2025.

Za su kara fafatawa nan gab a watan gobe, inda Barcelona za ta karɓi bakuncin Real Madrid a wasa na biyu a La Liga ranar 11 ga watan Mayu.

Wannan shi ne Copa del Rey na 31 da Barcelona ta ɗauka, ita ce kan gaba a yawan lashe shi, sai Athletic Bilbao mai 24 da kuma Real mai 20 jimilla.

Tuni dai aka yi waje da Real Madrid a Champions League a hannun Arsenal, ita kuwa Barcelona za ta buga daf da karshe da Inter Milan.

Barcelona ce kan gaba a teburin La Liga da tazarar maki huɗu tsakani da Real Madrid mai rike da kofin bara.

Wasannin da suka rage a gaban Barcelona:

Champions League Laraba 30 ga watan Afirilu

Spanish Primera Liga Sa 03 ga watan Mayu

Champions League Tu 06 ga watan Mayu

Spanish Primera Liga Su 11 ga watan Mayu

Spanish Primera Liga Th 15 ga watan Mayu

Spanish Primera Liga Su 18 ga watan Mayu

Spanish Primera Liga Su 25 ga watan Mayu

Wasannin da suka rage a gaban Real Madrid:

La Liga Lahadi 4 ga watan Mayu

La Liga Lahadi 11 ga watan Mayu

La Liga Laraba 14 ga watan Mayu

La Liga Lahadi 18 ga watan Mayu

La Liga Lahadi 25 ga watan Mayu

Bayanai kan ƴan wasan da Barca da Real suka fara wasan da su:

Ferran Torres ya fara buga wa Barcelona wasan a madadin Robert Lewandowski, wanda ke jinya.

Haka kuma Gerard Martin ya fara tsare baya daga ɓangaren hagu, wanda ya maye gurbin Alejandro Balde, wanda shima ke jjinya.

Ƙyaftin Marc-Andre ter Stegen yana benci, wanda ya daɗe yana jinya sakamakon raunin da ya ji a wasan La Liga tun daga cikin watan Satumba.

Ƴan wasan Barcelona 11 da suka fara wasan Real Madrid:

Szczesny, Kounde, Cubarsi, Martinez, Martin, De Jong, Pedri, Yamal, Olmo, Raphinha, Torres.

Masu jiran ko-ta-kwana::

Pena, ter Stegen, Christensen, Garcia, Fort, Araujo, Lopez, Gavi, Torre, Fati da kuma Victor.

Ɗan wasan Real Madrid, Kylian Mbappe, wanda ya ji rauni a wasa da Arsenal a Champions League a Santiago, ya fara da zaman benci.

Ferland Mendy ya fara wasan na Copa el Rey ranar Asabar, wanda ya sha jinyar mako uku.

Ƴan ƙwalllon Real Madrid da suka fuskanci Barcelona:

Courtois, Mendy, Rudiger, Aencio, Vazquez, Tchouameni, Ceballos, Valverde, Bellingham, Vinicius da kuma Rodrygo.

Masu jiran ko-ta-kwana:

Lunin, Gonzalez, Alaba, Garcia, Vallejo, Modric, Guler, Diaz, Endrick, Mbappe.