Yaushe Wike zai sakar wa Fubara mara?

Tun bayan komawar Siminalayi Fubara ofis a matsayin gwamnan jihar Rivers a ranar 18 ga watan Satumba, bayan kwashe watanni shida a dakace sakamakon dokar ta-ɓaci da shugaba Bola Tinubu ya ƙaƙaba wa jihar sakamakon rikice-rikicen siyasa, ake ta ganin Wike da Fubara inda a ƙarshen makon ma mutanen biyu suka yi wata ganawar sirri.

Ana dai ganin cewa ganawar ta sirri ba za ta rasa nasaba da rushe kwamishinoni da sauran ma'aikatan gwamnatin da Fubara ya yi ba, a ranar bikin cikar Najeriya shekara 65 da samun ƴancin kai.

Masu fashin baƙin na ganin ganawar da mutum biyun suka yi na da alaƙa da koƙarin sasantawa ta hanyar raba muƙaman kwamishinonin da za a naɗa a nan gaba, wani abu da ake ganin na ɗaya daga batutuwan da aka cimma da gwamnan - wato raba mukamai tsakaninsa da Wike.

Hakan ya janyo tambayar ko yaushe ne Wiken zai sakarwa zaɓaɓɓen gwamnan mara?

Wike ba zai sakar wa Fubara maraba - Masani

Farfesa Kamilu Sani Fagge, masanin kimiyyar siyasa ne ko malami a jami'ar Bayero da ke Kano.

Farfesan ya ce babu wani lokaci da ministan na Abuja, Nyesom Wike zai sakar wa tsohon yaron nasa mara har sai ya ga ya samu kykkyawa dama a kansa wadda ba zai iya yin wani motsin kirki ba a siyasance.

"Wike na da tasiri sosai a gwamnatin tarayya kuma muddin dai bai samu abubuwan da yake bukata ba to babu wani abu da zai yi tasiri. A halin yanzu ɓangaren Wike ne ke da rinjaye a majalisar dokoki sannan ga goyon bayan da yake da shi a gwamnatin tarayya."

Wannan ne zai sa shi Fubara dole ne sai ya sassauto ya bi abubuwan da shi Wike ke so ba domin hakan ne shi yake so ba domin a tsarin siyasar idan ba haka ya yi ba to zai zama yana fama da matsaloli da dama." In ji Farfesa Kamilu Sani Fagge.

Me ya kamata Fubara ya mayar da hankali a kai?

Wani mai sharhi kan siyasa a Najeriya Olalekan Ige ya shaida wa BBC cewa abin da ya kamaci Fubara shi ne ya kama aiki kan jiki kan karfi saboda babu sauran lokaci mai tsawo da ya rage masa.

Ya ce akwai ayyuka da yawa da suka kamata gwamnan ya aiwatar musamman batun ƙarasa ayyukan gwamnatin jihar da aka dakatar sanadiyyar dokar ta-baci da aka kafa da kuma kawo sabbin ayyukan ci gaban jihar.

Ige ya ce yanzu 'yan watanni suka rage kafin shekarar 2025 ta kare, sannan 2026 za ta kasance shekarar da hankula za su koma kan zaben 2027.

A cewarsa gwamnan bai da wani lokaci da zai tsaya yin bincike-binciken abubuwan da suka faru, babban abin da ya fi kamata ya mayar da hankali a kai shi ne kawo manufofi da ayyukan da za su bunkasa rayuwar al'ummar jihar Rivers.

Shi kuwa tsohon shugaban kungiyar lauyoyi ta Najeriya O.C.J Okocha cewa ya yi "abin da zan fada wa duk wanda wannan lamarin ya shafa, musamman gwamna Fubara da kuma shugaban majalisar dokokin jihar Rivers, Martin Amaewhule shi ne su kalli abin da ya faru a matsayin wata matashiya.

"Ya kamata su koma aiki da niyyar yin jagoranci na gari. Zan kuma shawarce su, su zauna su yi karatun ta-natsu, su sani cewa ya kamata bangarorin gwamnati su taimaka wa juna ne, ba su rika fada da juna ba." In ji O.C.J Okocha.

Matsalolin da aka samu a jihar gabanin ayyana dokar ta-ɓaci

A lokacin sanar da dokar ta-ɓacin ranar 18 ga watan Maris, Tinubu ya dokar da gwamnan jihar da mataimakinsa da kuma duka mambobin majalisar dokokin jihar.