Nottingham Forest na daf da daukar Jesse Lingard
Asalin hoton, Getty Images
Tsohon dan kwallon Manchester United, Jesse Lingard na daf da komawa Nottingham Forest, bayan da yarjejeniyarsa ta kare a karshen kakar da ta wuce.
Mai shekara 29, wanda ya buga wa Ingila wasa 32 ana ta alakanta shi da sabuwar kungiyar da za ta fara buga Premier League a bana, amma ba a kai ga cimma yarjejeniya ba.
Ya bar United, bayan shekara 20 a Old Trafford, bayan da kwantiraginsa ya kare a karshen watan Yuni.
Ana kuma alakanta Lingard da cewar zai koma West Ham.
Ya buga wa West Ham United wasannin aro a 2020-21, ya kuma taka rawar gani da cin kwallo tara a wasa a gasar Premier League.
Lingard, wanda ya tattauna da Everton, ya yi wasa 22 a Manchester United a kakar da ta wuce, sai dai wasa hudu ciki ne aka fara da shi a cikin fili.
