Kylian Mbappe na Edinson Cavani bagiye kumara ibyumweru badakina kubera imvune

Inyandiko gusa
Kylian Mbappe (uri hagati) amaze gutsinda igitego kimwe mu mikino itatu ya mbere ibanza ya shampiyona PSG yakinnye, naho Edinson Cavani we amaze gutsinda bibiri

Ahavuye isanamu, EPA

Insiguro y'isanamu, Kylian Mbappe (uri hagati) amaze gutsinda igitego kimwe mu mikino itatu ya mbere ibanza ya shampiyona PSG yakinnye, naho Edinson Cavani we amaze gutsinda bibiri

Rutahizamu Edinson Cavani agiye kumara ibyumweru bine adakina naho Kylian Mbappe amare ibyumweru bitatu, aba ba rutahizamu ba Paris Saint-Germain (PSG) bavunikiye mu gihe kimwe.

Ku cyumweru, basimbujwe nyuma yo kuvunika mu mukino PSG yatsinzemo Toulouse ibitego 4-1.

Cavani, Umunya-Uruguay w'imyaka 32, yavunitse mu itako naho Mbappe, Umufaransa w'imyaka 20, agira ikibazo ku gice cyo hejuru cy'akaguru.

Aba bakinnyi bombi ntabwo bazashobora gukina imikino igera kuri ibiri.

Ariko Cavani ashobora kuzaba yakize ubwo PSG iza ikina umukino wayo wa mbere wo mu matsinda ya Champions League, ku itariki ya 17 cyangwa iya 18 y'ukwezi gutaha kwa cyenda.

Neymar we yahagaritswe gukina imikino itatu ibanza ya Champions League uyu mwaka.

Ariko uyu Munya-Brezili w'imyaka 27 bivugwa ko ashobora gusubira muri Barcelone mbere yuko igura n'igurishwa ry'abakinnyi i Burayi rirangira uyu mwaka ku itariki ya kabiri y'ukwa cyenda.

Cavani kandi ntazashobora gukina imikino ya gicuti ikipe y'igihugu ya Uruguay izakina na Costa Rica na Leta Zunze Ubumwe z'Amerika.

Skip Ibisomwa cane and continue reading
Ibisomwa cane

End of Ibisomwa cane

Mbappe we ntazashobora gukina umukino w'amajonjora y'igikombe cya Euro 2020 Ubufaransa buzakinira iwabwo bukina na Albania na Andorra.