Umutoza Unai Emery wa Arsenal ati: 'Mesut ari gukina nkuko tubishaka'

Umutoza Unai Emery wa Arsenal avuga ko umukinnyi we wo hagati Mesut Ozil "ari gukina nkuko tubishaka" nyuma yaho mu mukino w'ejo ku wa mbere wayihuje na Newcastle atowe nk'umukinnyi wahize abandi muri uwo mukino.

Ozil wagiye rimwe na rimwe adakinishwa n'uyu mutoza ukomoka muri Espanye kuva yatangira gutoza iyi kipe muri uyu mwaka w'imikino, yafashije Arsenal gutsinda Newcastle ibitego 2-0, iba intsinzi ya 10 yikurikiranya muri shampiyona ku kibuga cyayo cya Emirates.

Umutoza Emery yagize ati: "Nkunda ukuntu buri mukinnyi ari gukina kuri ubu kandi na Mesut n'ubuhanga bwe ari kudufasha kandi ari no kwitanga".

Aaron Ramsey na Alexandre Lacazette ni bo batsinze ibyo bitego bya Arsenal.

Mbere y'iyo ntsinzi y'ejo ku wa mbere, Ozil yari amaze gutangira mu mikino itatu gusa ya shampiyona guhera ku itariki ya 26 y'ukwezi kwa 12 k'umwaka ushize wa 2018.

Mu kwezi kwa kabiri uyu mwaka, Emery yavuze ko Ozil, Umudage w'imyaka 30 y'amavuko, agomba "kwitwara neza mu buryo buhoraho mu myitozo no mu mikino, yirinda kuvunika cyangwa kurwara". Nyuma yongeyeho ko Ozil azakomeza kujya anyuzamo ntakinishwe.

Ariko nyuma yuko yitwaye muri uwo mukino bigatuma anahabwa igihembo nk'umukinnyi wahize abandi muri uwo mukino, Emery yagize ati: "Mesut ari gukina nkuko tubishaka, haba hamwe n'abandi mu ikipe no mu mikinire ye bwite. Ari kwitanga cyane kandi akaduha ku buhanga bwe".

Intsinzi ya Arsenal yatumye ijya imbere ya Tottenham - mucyeba wayo wo mu majyaruguru y'umujyi wa London - ndetse n'imbere ya Manchester United, kuri ubu ikaba iri ku mwanya wa gatatu ku rutonde rw'agateganyo rwa shampiyona ya Premier League.

Emery yavuze ko ikipe ye ubu ifite akazi gakomeye ko kuguma kuri uwo mwanya kugeza shampiyona irangiye.