Liverpool yanganyije na West Ham, byongerera amahirwe amakipe bahatanira igikombe

Liverpool iri ku mwanya wa mbere by'agateganyo ku rutonde rwa shampiyona ya Premier League, yongereye amahirwe amakipe bahataniye igikombe nyuma yaho ikosa ryo mu bwugarizi itari isanzwe izwiho ritumye itegukana intsinzi ku kibuga cya West Ham.

Iyi kipe itozwa n'umutoza Jurgen Klopp, ubu noneho irarusha amanota atatu Manchester City iri ku mwanya kabiri.

Ariko ikinyuranyo cy'amanota icyenda cyatandukanyaga aya makipe ku itariki ya 29 y'ukwezi kwa cumi na kabiri mu mwaka ushize wa 2018, cyamaze kugabanuka kijya ku manota atatu nyuma yaho Liverpool inganyije mu mikino ibiri ikurikirana ndetse na Manchester City igasubira mu bihe byayo byiza by'intsinzi.

Ku cyumweru gishize, City yatsinze Arsenal ibitego 3-1.

Iyi City ishobora no kwisubiza umwanya wa mbere w'agateganyo - bwa mbere guhera ku itariki ya 5 y'ukwezi kwa cumi na kabiri - niramuka itsinze Everton ku wa gatatu.

Tottenham nayo rurageretse mu guhatanira iki gikombe cya shampiyona, nyuma yaho itsinze imikino itatu ikurikirana. Ifite amanota 57, ikarushwa atanu na Liverpool.

Liverpool ifite n'impungenge z'imvune, ku bakinnyi bayo Dejan Lovren, Jordan Henderson na Georginio Wijnaldum, biyongera kuri Joe Gomez na Trent Alexander-Arnold batari gukina.

Nyuma yo kunganya na West Ham igitego 1-1, Klopp yagize ati: "Mu ijoro ryashize [ryabanjirije uwo mukino], twakoze imyitozo, nuko nyuma duhindura imyanya itatu".

"Ni ko byagenze, ntabwo ari urwitwazo. Imyiteguro y'umukino ntabwo yabaye ntamacyemwa, ariko nubundi twashoboye kubona inota rimwe".

Igitego cyo kurarira?

Ni umukino wari watangiye neza kuri Liverpool ubwo Sadio Mane yatsindaga igitego ku ishoti yanyujije ku munyezamu Lukasz Fabianski wa West Ham ku munota wa 22, nubwo James Milner yari yagaragaye mu buryo bwo kurarira mbere y'icyo gitego.

West Ham yagaragaje gusatira cyane, byagaragazaga ko Liverpool itaza kwiharira umukino.

Nyuma y'iminota itandatu, yaje kubona igitego cyo kwishyura ubwo ba myugariro ba Liverpool bananirwaga gutahura umupira w'umuterekano wa Felipe Anderson utewe mu buryo bwo kujijisha.

Nuko ntibabona Michail Antonio wahise wirukira mu rubuga rw'amahina, akohereza umupira mu mfuruka y'izamu.

Liverpool ubu igiye gukurikizaho umukino na Bournemouth, hanyuma ikurikizeho imikino y'indyankurye izayihuza na Bayern Munich na Manchester United mu mpera y'uku kwezi kwa kabiri.

Kuri West Ham, yashoboye kurangiza igihe cy'imikino itatu yari imaze itsindwa mu marushanwa yose.

Iyi kipe itozwa n'umutoza Manuel Pellegrini igumye ku mwanya wa 12, ariko ubu noneho iranganya amanota na Leicester iri ku mwanya wa 11.