Umutoza Jurgen Klopp wa Liverpool, wirukankiye mu kibuga yishimira intsinzi, yaciwe amande
Ahavuye isanamu, Getty Images
Umutoza Jurgen Klopp w'ikipe ya Liverpool yemeye ikirego cyo kwitwara nabi ubwo yirukankiraga mu kibuga yishimira igitego cy'intsinzi cyo ku munota wa 96 ku kibuga Anfield cya Liverpool ubwo yakinaga na Everton.
Ku cyumweru gishize, Klopp yirukankiye mu kibuga guhobera umunyezamu Alisson wa Liverpool nyuma y'igitego cyari kimaze kwinjizwa na Divock Origi mu mukino w'amahari uzwi ku izina rya Merseyside derby uhuza ayo makipe.
Klopp yaciwe amande angana n'ibihumbi umunani by'amapawundi (arenga miliyoni 8 mu mafaranga y'u Rwanda) n'ishyirahamwe ry'umupira w'amaguru mu Bwongereza, ndetse aburirwa ku myitwarire ye yo mu bihe biri imbere.
Avuga kuri icyo gihano, Klopp yagize ati:
"Icyo ni cyo amategeko aberaho. Nta kundi byari kugenda".
Umudage Klopp yari yaramaze gusaba imbabazi kuri iyo myitwarire ye yo ku cyumweru gishize, none ubu yashimangiye ko "bitazongera ukundi".
Yongeyeho ati:
"Iyo urenze ku mategeko, ugomba kubiciribwa amande".
"Iyo amategeko ataza kubaho, abatoza bari kujya iteka bishimira intsinzi bari mu kibuga . Sintekereza ko hari umuntu watekereje ko [ibyo nakoze] byari bibi cyane".
"Ubwo naherukaga kubikora, ni mu myaka 14 ishize. Ubu sinkihuta nk'icyo gihe".
Ubwo yaganiraga n'itangazamakuru nyuma y'uwo mukino wo ku cyumweru Liverpool yatsinzemo Everton 1-0 bigatuma yegera ho amanota abiri Manchester City iri ku mwanya wa mbere by'agateganyo muri shampiyona ya Premier League, Klopp yagize ati:
"Ngomba gusaba imbabazi kuko ntabwo nashakaga kugira uwo nubahuka - ariko nanone ntabwo nari kwitangira".
