Sergio Ramos yanenze umutoza Jurgen Klopp wa Liverpool

Sergio Ramos, kapiteni w'ikipe ya Real Madrid, yanenze umutoza Jurgen Klopp wa Liverpool nyuma y'amagambo yamuvuzeho ku mukino wa nyuma wa Champions League wo mu kwezi kwa gatanu Real Madrid yatsinzemo Liverpool ibitego 3-1.

Ramos w'imyaka 32 y'amavuko, yagize ati:

"Bamwe muri twe tumaze imyaka myinshi dukina umupira wo ku rwego rwo hejuru. Sinzi neza niba we [Jurgen Klopp] yavuga nk'ibi."

Umutoza Klopp yanenze Ramos kubera ukuntu yakiniye rutahizamu Mohamed Salah bikamuviramo kuvunika urutugu.

Klopp yavuze ko Ramos yakinnye "bunyamaswa" mu mukino wa nyuma wa Champions League.

Ariko Ramos yavuze ati:

"Ntabwo mba nshaka kugira umukinnyi nkinira nabi ku bushake."

Yongeyeho ati:

"Ni uburyo bwo gushaka gusobanura impamvu atatsinze ku mukino wa nyuma, ariko si ubwa mbere yari atsinzwe ku mukino wa nyuma."

Mu mwaka wa 2012, Klopp yatsinze bwa mbere ku mukino wa nyuma ubwo yatwaraga igikombe cy'Ubudage atoza ikipe ya Borussia Dortmund.

Ariko kuva icyo gihe, amaze gutsindirwa ku mukino wa nyuma inshuro 6 - harimo no mu kwezi kwa gatanu uyu mwaka mu mukino wa nyuma wa Champions League no ku mukino wa nyuma wa Europa mu mwaka wa 2016 ubwo yatsindwaga na Sevilla.

Abafana benshi ba Liverpool banenze Ramos kubera ukuntu yakiniye Salah - umusifuzi akabyirengagiza - ndetse bandikira ishyirahamwe ry'umupira w'amaguru ku isi, FIFA, basaba ko Ramos ahanwa.

Umutoza Klopp yanavuze ko ukuntu Ramos yakiniye umunyezamu Loris Karius wa Liverpool, byamuviriyemo indwara yo kwibeshya mbere yuko akora amakosa abiri muri uwo mukino.

Ramos yagize ati:

"Ubwo twatoraga umutoza wahize abandi, ni we [Jurgen Klopp] natoye. Rero ubu ashobora gutuza."