Wayne Rooney mu mukino wa nyuma wo gusezera mu ikipe y'Ubwongereza

Wayne Rooney, ufite umuhigo wo kuba ari we watsindiye ikipe y'igihugu y'Ubwongereza ibitego byinshi kurusha abandi kugeza ubu, araza kuba ari kapiteni ndetse yambaye umwenda uriho nimero 10 mu gihe aza kuba yinjiye mu kibuga asimbura kandi anasezera muri iyi kipe.

Rooney w'imyaka 33 y'mavuko, yasezeye ku gukinira Ubwongereza mu mwaka wa 2017, ariko araza kubukinira kuri uyu wa kane ku nshuro ya 120 ari na yo ya nyuma mu mukino wa gicuti ubuhuza na Leta Zunze Ubumwe z'Amerika.

Urabera ku kibuga cya Wembley mu Bwongereza.

Fabian Delph araza kubanza mu kibuga nka kapiteni, ariko aze guha Rooney - ukina mu ikipe ya DC United yo muri Amerika - igitambaro cy'ubukapiteni ubwo aza kuba amusimbuye mu gice cya kabiri.

Rooney araza no gukorerwa umuhango abantu bahaguruka mu buryo bwo kumuha icyubahiro.

Rooney wahoze akinira amakipe ya Manchester United na Everton nka rutahizamu, yari yasezeye amaze gukinira Ubwongereza imikino 119 yaciyemo agahigo ko gutsinda ibitego 53.

Ariko ishyirahamwe ry'umupira w'amaguru mu Bwongereza rifata umukino wo kuri uyu wa kane nk'akanya ko "guha icyubahiro" "igihe yamaze akina umupira mpuzamahanga yaciyemo agahigo".

Delph, usanzwe akinira ikipe ya Manchester City, yagize ati:

"Ubwo nageraga bwa mbere mu ikipe y'Ubwongereza, Wayne yari kapiteni. Yampaye ikaze nuko amfata ku rutugu atuma numva ko nisanga".

"Akigera mu kibuga, ndahita musubiza igitambaro cy'ubukapiteni".

Delph yongeyeho ati:

"Riraza kuba ari ijoro ridasanzwe kuri Wayne kandi ni ingenzi ko tumuha icyubahiro ku bikorwa yagezeho".