Amakuru avuga ko ubuyobozi bwa Manchester United bugishyigikiye umutoza Jose Mourinho

Amakuru avuga ko ubuyobozi bw'ikipe ya Manchester United bugishyigikiye umutoza Jose Mourinho kandi bwizeye ko ashobora gukura iyi kipe mu bihe bikomeye irimo muri iki gihe.

Manchester United iracyira Newcastle kuri uyu wa gatandatu ku kibuga Old Trafford.

Iraza kuba yirinda gutsindwa uyu mukino, ushobora gutuma yaba imaze imikino itanu idatsinda - ibintu byaba biyibayeho bwa kabiri gusa guhera mu mwaka wa 1998.

Uko Manchester United yitwaye mu mikino ishize ya vuba, kwatumye hakomeza guhwihwiswa amakuru ajyanye n'ejo hazaza h'uyu mutoza wahoze atoza amakipe arimo Chelsea na Real Madrid.

Ariko byumvikana ko kuri ubu akazi ke k'ubutoza nta mpungenge agafiteho.

Mu bihe byashize, ubuyobozi bwa Manchester United bwavuze ko uko uyu mutoza yitwara mu mikino itandukanye ari byo bizashingirwaho ngo hamenyekane niba yakomezanya n'iyi kipe cyangwa ntakomezanye nayo.

Kandi na n'ubu ni uko bikimeze, nubwo bwose hari amakuru avuga ko hari umwuka mubi muri iyi kipe udashyirwa ku karubanda.

Ubwo Manchester United yatsindwaga 3-1 na West Ham mu mpera y'icyumweru gishize, byatumye kiba cyo gihe mu mateka y'iyi kipe itangiye nabi cyane shampiyona mu myaka 29 ishize.

Kwitwara nabi kw'iyi kipe kwagiye kugirwamo uruhare n'ibibazo byo hanze y'ikibuga, nk'umubano hagati y'umutoza Mourinho n'umukinnyi wo hagati Paul Pogba - umubano wagarutsweho cyane mu bitangazamakuru.

Nyuma y'umukino na Newcastle wo kuri uyu wa gatandatu, Manchester United izakina na Chelsea muri shampiyona, ikine imikino ibiri na Juventus mu mikino ya Champions League, hanyuma ikine na mucyeba Manchester City nyuma yaho mu mukino wa shampiyona.