Abakapiteni muri shampiyona ya La Liga yo muri Espanye baraganira ku "mpungenge" ku gukinira muri Amerika

Kapiteni Sergio Ramos wa Real Madrid na kapiteni wungirije wa Barcelona, Sergio Busquets, ni bamwe mu bitabira inama iba kuri uyu wa gatatu y'abakinnyi bo muri shampiyona y'umupira w'amaguru mu cyiciro cya mbere muri Espanye ya La Liga.

Bariga ku "mpungenge" ku cyemezo cyo gukinira umukino muri Leta Zunze Ubumwe z'Amerika.

Ku wa gatanu, ubuyobozi bwa La Liga bwagiranye amasezerano y'imyaka 15 n'ikigo cy'itangazamakuru cya Relevent cyo muri Amerika.

Ishyirahamwe ry'abakinnyi bakinira muri Espanye ryatangaje ko abakinnyi batagishijwe inama.

Itangazo ryasohoye rigira riti:

"Ku yindi nshuro nanone, abakinnyi b'umupira w'amaguru barumva barashyizwe ku ruhande mu gufata icyemezo."

"Twemera ko ibitekerezo byabo ari ingenzi mu iterambere ry'umupira w'amaguru wa Espanye."

"Turasaba ko impande zose zumvwa kandi hakabaho gushyira mu gaciro. Niba ikintu gisumba ibindi ari ibyishimo umupira w'amaguru utanga, kuki ibyemezo bifatwa birwanya ibyo byishimo?"

Abakapiteni cyangwa abahagarariye amakipe 20 akina muri shampiyona y'umupira w'amaguru mu cyiciro cya mbere muri Espanye, barahurira ku cyicaro gikuru cy'iri shyirahamwe kiri i Madrid.

Ubuyobozi bwa La Liga bubajijwe igihe uyu mukino wo muri Amerika uzabera ndetse niba uzaba ari umukino uhoraho, bwabwiye BBC Sport ko "budashobora kwemeza amakipe, umukino, itariki cyangwa umwaka w'imikino."

Iri tangazo ry'ishyirahamwe ry'abakinnyi b'umupira w'amaguru muri shampiyona ya La Liga, ryongeyeho ko "ubuyobozi bwa La Liga buri gutuma abafana bitaza abakinnyi, ikintu kibangamiye kamere y'umupira w'amaguru."