Uriko ubona ku rubuga aherekana amakuru mu nyandiko gusa, hakoresha uburyo buke. Ja ku rubuga nyamukuru ubone amakuru mu nyandiko iherekejwe n'amasanamu.
Njana ku rubuga nyamukuru canke aho gusoma gusa
Ibindi vyerekeye ingene urwo rubuga rugutwara uburyo (ama mega) buke
Luka Modric, Cristiano Ronaldo na Mohamed Salah ni bo bazatoranywamo uwahize abandi i Burayi
Luka Modric, Cristiano Ronaldo na Mohamed Salah, ni bo bari ku rutonde rwa nyuma rw'abakinnyi ishyirahamwe ry'umupira w'amaguru ku mugabane w'Uburayi, UEFA, rizatoranyamo uwahize abandi kuri uyu mugabane muri uyu mwaka.
Modric, umukinnyi wo hagati mu ikipe ya Real Madrid, Cristiano, rutahizamu mushya w'ikipe ya Juventus, na Salah, rutahizamu w'ikipe ya Liverpool, batoranyijwe n'itsinda ry'abatoza 80 n'abanyamakuru 55.
Iki gihembo kizatangirwa mu muhango wa tombola y'amatsinda ya Champions League uzabera i Monaco ku itariki ya 30 y'uku kwezi kwa munani.
Pernille Harder, Ada Hegerberg na Amandine Henry, ni bo bari ku rutonde rugufi ruzatoranywamo uzahabwa igihembo nk'icyo ariko mu mupira w'amaguru w'abagore.
Rutahizamu Harder wo muri Denmark akinira ikipe ya Wolfsburg, mu gihe rutahizamu Hegerberg w'ikipe y'igihugu ya Norvège na Henry ukina hagati ariko asubira inyuma mu ikipe y'Ubufaransa bombi bakinana mu ikipe ya Lyon.
Cristiano wageze mu ikipe ya Juventus mu kwezi kwa karindwi avuye muri Real Madrid aguzwe miliyoni 99 n'ibihumbi 200 by'amapawundi, ni we watsindiye iki gihembo gitangwa na UEFA mu mwaka ushize wa 2017.
Umuholandikazi ukina hagati mu kibuga, Lieke Martens, ni we wari watwaye icyo gihembo mu rwego rw'abagore nyuma gato yo kuva mu ikipe yo muri Suède ya Rosengard akerekeza muri Barcelona.
