Kenya izakira irushanwa ry'isi ryo gusiganwa ku maguru mu mwaka wa 2020
Ahavuye isanamu, Getty Images
Ishyirahamwe ry'umukino wo gusiganwa ku maguru ku isi, ryahisemo Nairobi, umurwa mukuru wa Kenya, nk'ahantu hazabera amarushanwa y'abari mu nsi y' imyaka 20 y'amavuko izaba mu mwaka wa 2020.
Uyu mwanzuro ugaragara nk'ikimenyetso gishimangira Nairobi nk'ahantu ho kwakirira amarushanwa yo ku rwego rw'isi, nyuma y'ayo iki gihugu cyakiriye "neza cyane" y'abari munsi y'imyaka 18 y'amavuko, mu mwaka ushize wa 2017.
Iri shyirahamwe rivuga ko Kenya ari igihugu cy'ukuri cy'umukino wo gusiganwa ku maguru.
Sebastian Coe, umuyobozi w'iri shyirahamwe ry'umukino wo gusiganwa ku maguru ku isi, yagize ati:
"Imikino y'isi y'abari mu nsi y'imyaka 20 y'amavuko ni uburyo bwo kugaragaza ejo hazaza, rero Kenya, nk'igihugu gituwe n'abaturage biganjemo urubyiruko kandi bafite ishyaka kikanagira amateka akomeye muri uyu mukino, ni ahantu hujuje ibyo dusaba."
Iri shyirahamwe rivuga ko imikino iheruka kuhabera y'abari mu nsi y'imyaka 18 y'amavuko, yarebwe n'abantu bagera ku bihumbi 60.
Uku gutoranywa kubusanye no kwangirwa kwa Kenya kwo kwakira imikino y'igikombe cy'Afurika mu mupira w'amaguru ku bakinnyi bakinira kuri uyu mugabane kubera gucyererwa mu myiteguro n'ibibuga bitujuje ibyasabwaga.
Yabyangiwe mu mwaka ushize wa 2017.
Iyo mikino yabereye muri Maroc.
