Uriko ubona ku rubuga aherekana amakuru mu nyandiko gusa, hakoresha uburyo buke. Ja ku rubuga nyamukuru ubone amakuru mu nyandiko iherekejwe n'amasanamu.
Njana ku rubuga nyamukuru canke aho gusoma gusa
Ibindi vyerekeye ingene urwo rubuga rugutwara uburyo (ama mega) buke
100$ kuri AK47, 1$ ku isasu ku uzanye intwaro ku bushake muri Kivu ya Ruguru
Ubutegetsi bwa gisirikare muri Kivu ya Ruguru bwatangaje umuhate wo kuvana intwaro muri rubanda aho abazajya bazizana ku bushake bazajya bishyurwa amadorari mu gikorwa cyatewe inkunga na leta kigamije gushaka umutekano.
Mu itegeko ry'iyi ntara iyobowe mu buryo bwa gisirikare ryasomwe na Lieutenant Marc Elongo umuvugizi wa guverineri, yavuze ko intwaro ziri mu baturage ari kimwe mu biteza ubugizi bwa nabi bitwaje intwaro n'umutekano mucye, kuko abaturage bazitunze mu buryo bunyuranyije n'amategeko.
Iyi ntara yacitsemo ibice bibiri kandi ifite ba guverineri babiri.
Igice kinini cy'iyi ntara kigenzurwa na leta ya Kinshasa kirimo teritwari za Beni, igice kinini cya Lubero n'igice kinini cya teritwari ya Walikale. Ikindi gice cy'iyi ntara kirimo teritwari za Masisi, Rutshuru, ibice bito bya Lubero na Walkale n'umujyi wa Goma kigenzurwa n'umutwe wa AFC/M23.
Inama y'ubutegetsi y'intara ya Kivu ya Ruguru - ahagendera ku mategeko ya leta ya Kinshasa - yategetse ko haba gukusanya intwaro muri rubanda n'ibiturika binyanyagiye mu gasozi.
Guverineri w'iyi ntara yashyizeho abagize za komisiyo kuva ku rwego rw'intara, teritwari na za komine bagomba kuyobora iki gikorwa cyo kuvana intwaro muri rubanda.
Lieutenant Marc Elongo yagize ati: "Mu gushumbusha umuntu wese utanze intwaro kuri iyo komisiyo, guverinoma izajya itanga;
- 100$ ku ntwaro ya AK47 cyangwa iyo bingana
- 200$ ku ntwaro y'ubufasha (intwaro yisumbuyeho)
- 1$ ku isasu rimwe
Itegeko ryasomwe na Elongo rivuga ko umuntu wese ushaka gutanga intwaro aariko umwirondoro we ntumenyekane, ashobora kwegera abategetsi akarindwa kandi iyo ntwaro igashyikirizwa abagize komisiyo zashyizweho.
Abanenga leta ya Kinshasa bamaganye ko leta yahaye intwaro abasivile bo mu mitwe yitwaje intwaro izwi nka Wazalendo hagamijwe kurwana n'umutwe wa AFC/M23.
Abagize za sosiyete sivile bavuga ko izo ntwaro ziri mu baturage ari zo zifashishwa mu bugizi bwa nabi n'ubwicanyi buvugwa mu baturage.
Uretse kubashumbusha, iri tegeko rishya ry'intara ya Kivu ya Ruguru rivuga ko "nta muntu ugomba gukurikiranwa ku gusubiza intwaro cyangwa amasasu ku bushake".
