Ubutaliyani bwaguze ishusho idasanzwe kuri miliyoni 30 z'ama-euro

Leta y'Ubutaliyani yaguze ishusho yakozwe n'umuhanzi ukomeye wo mu kinyejana cya 16 n'icya 17 witwa Michelangelo Merisi da Caravaggio ku giciro cya miliyoni 30 z'ama-euro (miliyari zirenga 50 FRW), iki ni kimwe mu biciro byo hejuru cyane igihugu kiguze igikorwa cy'ubugeni.

Minisitiri w'umuco w'Ubutaliyani yavuze ko iki gishushanyo, cyerekana umunyedini Monsignor Maffeo Barberini - waje kuba Papa Urban VIII - "gifite agaciro gakomeye cyane".

Yavuze ko kugura iki gikorwa biri mu mugambi mugari wo kurinda ibihangano bikomeye by'igihugu kugira ngo bitagurwa n'abakusanya ibihangano ku giti cyabo.

Iyi shusho yari ibitswe mu ikusanyirizo ryihariye ry'ibihangano mu mujyi wa Florence, kandi yerekanwe bwa mbere mu ruhame i Roma mu mwaka wa 2024.

Caravaggio yari azwi cyane mu gukoresha urumuri mu gushushanya ku buryo abantu ari gushushanya basa n'aho ari bazima. Ku isi hose hasigaye ibihangano bye bizwi bigera kuri 65, kandi bitatu gusa ni byo by'amashusho y'abantu (portraits).

Iyi shusho yimuriwe mu bubiko buhoraho bw'ibihangano bwa Palazzo Barberini – inzu y'amateka y'umuryango wa Maffeo Barberini iri mu mujyi wa Rome – aho n'ubundi yerekaniwe bwa mbere ku mugaragaro.

Izaba iri hamwe n'ibindi bihangano by'uriya munyabugeni.

Iyi shusho yakozwe mu mwaka wa 1598, igaragaza Barberini nk'umupadiri ufite ubwanwa, usa n'utanga amabwiriza arambuye ukuboko kwe kw'iburyo.

Barberini yatorewe kuba Papa mu 1623, yitwa Papa Urban VIII, ategeka Kiliziya Gatolika kugeza apfuye mu 1644. Yari azwi nk'umuntu washyigikiraga cyane ubugeni n'ubuhanzi.

Alessandro Giuli, Minisitiri w'umuco w'u Butaliyani yavuze mu itangazo ko kugura iyi shusho ari igice cy'umushinga mugari wo gukomeza kurinda no guteza imbere umurage ndangamuco w'igihugu.

Hagamijwe ko ibihangano bikomeye by'amateka y'ubuhanzi biboneke ku bashakashatsi no ku babikunda, aho kujya mu maboko y'ababigura ku giti cyabo.

Caravaggio, amazina ye nyakuri akaba Michelangelo Merisi, yapfuye mu 1610 afite imyaka 38.

Yari azwi cyane ku buryo bwe bwo gushushanya bwitwa Chiaroscuro.

Uburyo butangaje bwo kwifashisha urumuri n'igicucu mu kwerekana ishusho nk'ifite ubuzima n'amarangamutima akomeye, no mu mashusho yerekana urugomo yakundaga gushushanya.