Abanya-Iran "ntibazagonda ijosi" – Ibitero byakubise hafi y'imyiyerekano y'abashyigikiye Mojtaba Khamenei

Igisirikare cya Israel cyatangaje ko cyagabye ibitero byinshi ahatandukanye muri Iran, mu gihe abashyigikiye Repubulika ya Kislamu bari bahuriye mu mihanda bishimira igenwa ry'umutegetsi w'ikirenga mushya.

Mojtaba Khamenei yatowe ku cyumweru ngo asimbure se, Ayatollah Ali Khamenei wishwe iyi ntambara igitangira.

Avuga bwa mbere kuri icyo cyemezo, Perezida Donald Trump yavuze ngo "sinishimye".

Hagati aho, Iran yarashe ibindi bitero bishya bya za misile muri Israel no ku bihugu byo mu kigobe cy'Abarabu birimo ibirindiro by'ingabo za Amerika, aho ku wa mbere byahitanye nibura umuntu umwe.

Nyuma y'itorwa rya Mojtaba Khamenei ryatangajwe ku cyumweru nijoro cyane, ku wa mbere abategetsi muri Irana basabye abantu guhurira mu bibanza bizwi mu mijyi no mu mihanda ikomeye mu gihugu "kwifatanya" n'uyu mugabo w'imyaka 56 watowe.

Amashusho yatangajwe n'ibinyamakuru muri Iran yerekana imyiyerekano nk'iyo mu mijyi ya Tehran, Bojnurd, Tabriz, Zanjan, Kerman, Khorramabad, Mashhad, Bushehr, Yazd, Qom na Ilam.

Abantu ibihumbi bahuriye ku rubuga ruzwi nka Enghelab Square mu murwa mukuru baririmba ngo "Urupfu kuri Amerika, urupfu kuri Israel", "Imana ni yo nkuru" kandi bitwaje amafoto ya Mojtaba Khamenei n'aya se Ali.

Umwe mu rubyiruko yabwiye ikinyamakuru told Iran's Student News Network (SNN) ko ishyirwaho ry'umutegetsi mushya rivuze ko abaturage ba Iran "bariho kandi batazagonda ijosi".

Umugabo uri mu myaka 30 yabwiye BBC Persian ko "nta mahirwe na macye cyane asigaye yo guhindura ubutegetsi".

Ku cyumweru nijoro, amwe mu mashusho ku mbuga nkoranyambaga yagaragaje abantu i Tehran barimo kuririmba ngo "Urupfu kuri Mojtaba" bari ku mabaraza y'ingo zabo.

Nta byinshi cyane bizwi kuri Mojtaba Khamanei utari waragiye mu mwanya w'ubutegetsi mbere ariko bivugwa ko yari umuntu w'ijambo rikomeye mu butegetsi bwa se utaboneka imbere.

Minisiteri y'ububanyi n'amahanga ya Israel yamaganye ishyirwaho rya Mojtaba ivuga ko ari "undi munyagitugu ugiye gukomeza ubutegetsi bw'ubugome bwa Iran".

Naho Vladimir Putin w'Uburusiya yashimye ishyirwaho rya Mojtaba anatangaza ko Uburusiya bumushyigikiye kandi nawe ubwo azakomeza kuba "umufatanyabikorwa wo kwizerwa".

Mbere y'uko ashyirwaho, ku cyumweru Perezida Donald Trump yari yaburiye ko umutegesi wese uzashyirwaho muri Iran atamwemeje "ntabwo azaratinda".

Ku wa mbere abajijwe gahunda afitiye umutegetsi mushya washyizweho, Trump yabwiye New York Post ati: "Sindi buyibabwire. Ntabwo mwishimiye."

Kuri gahunda y'ibyumweru bine cyangwa bitanu by'intambara, ubu yabwiye CBS News ati: "Ntekereza ko intambara urebye yageze ku ntego neza. Nta gisirikare basigaraganye, nta rumanaho. Nta gisirikare cyo mu kirere".

Mu ijoro ryo ku wa mbere Trump yavuze ko Amerika "yatsinze mu nzira nyinshi, ariko ntituratsinda bihagije".

Igisirikare cya Amerika ku wa mbere cyatangaje ko muri iyi ntambara kimaze kurasa ahantu 5,000 harimo amato 50 ya Iran, hamwe n'ubwirinzi bwo mu kirere, ahaba misile 'ballistic', n'itumanaho rya gisirikare.

Igisirikare cya Israel kivuga ko indege zacyo z'intambara zagabye ibitero ku bikorwa remezo bya gisirikare i Tehran, Isfahan hagati mu gihugu n'i Shiraz mu majyepfo kuwa mbere.

Abatuye muri Tehran babwiye BBC Persian ko bumvise guturika kwinshi mu gihe bari mu myiyerekano yo gushyigikira Mojtaba Khamenei ku rubuga rwa Enghelab Square.

Televiziyo ya Iran yatangaje ko hari uguturika kwabaye hafi cyane y'abantu bari mu myiyerekano ku rubuga rwa Naqsh-e Jahan square mu mujyi wa Isfahan.

Amashusho yerekanye abantu benshi bitwaje amabendera baririmba ngo "Imana ni yo nkuru" mu gihe inyuma yabo hazamukaga imyotsi kubera uko guturika.

Umuryango utabara wa Red Crescent wa Iran ku wa mbere nimugoroba watangaje ko hari imirambo wakuye ku rubuga rwa Resalat Square i Tehran.

Kuva iyi ntambara itangiye abantu 1,230 muri Iran bamaze gupfa, nk'uko bivugwa na Red Crescent ya Iran, ntabwo ivuga niba muri bo harimo abasirikare.

Naho ikigo Human Rights Activists News Agency (HRANA) gikorera muri Amerika kivuga ko abantu bamaze gupfa muri Iran ari 1,708 harimo abasivile 1,205 n'abasirikare 187.

Iran yasubije ibitero bya Amerika na Israel byo ku wa mbere irasa za misile na 'drones' kuri Israel no mu bihugu byo mu karere bifite ibirindiro by'ingabo za Amerika.

Ku wa mbere, abategetsi muri Israel batangaje ko igitero cya Iran cyishe umukozi w'Umushinwa undi agakomereka ku nyubako irimo kubakwa mu mujyi wa Yehud.

Amashusho yashyizwe ku mbuga nkoranyambaga mu minsi ya vuba aha yerekana ibisasu bya misile biraswa na Iran bikaza gucikamo bombe ntoya bikagora cyane uburyo bwo kurinda ikirere kuzifata zose aho zashwiragiye zimanuka.

Muri Bahrain, abategetsi batangaje ko abasivile 32 bakomeretse mu gitero cya drone ya Iran ku wa mbere nijoro mu majyepfo y'umurwa mukuru Manama.

Muri Emira Zunze Ubumwe z'Abarabu, minisiteri y'ingabo yatangaje ko abasirikare bayo babiri bishwe ubwo kajugujugu barimo yisenuye hasi kubera "ikibazo tekinike ubwo yari iri mu mirimo y'igihugu"

Minisiteri y'ubutegetsi ya Qatar na yo yatangaje ko yafunze abantu 313 bakomoka mu bihugu bitandukanye batawe muri yombi bashinjwa "gukwirakwiza amakuru y'impuha" ku bitero bya Iran, harimo gufata amashusho no gukwirakwiza amashusho atemewe.

Hagati aho, Perezida Emmanuel Macron yavuze ko igihugu cye n'inshuti zacyo barimo gutegura ubutumwa "bwo kwitabara" bugamije gufungura umuhora wa Hormuz.

Ni mu gihe Iran yatangaje ko uyu muhora ihuriyeho na Oman, ucamo 20% by'ibitoro bijya ku isoko ry'isi, ufunze kuva iyi ntambara itangiye.

Gusa umwe mu bategetsi bakuru ba Iran yasubije ku byavuzwe na Macron ko uwo muhora utagiye gufungurwa "muri uyu muriro wacanwe na Amerika na Israel mu karere".