Ukraine ivuga ko yasambuye ubuhinga bw’Uburusiya bwo kwivuna ibitero vyo mu kirere muri Crimea

Ukraine ivuga ko yasambuye ubuhinga karuhariwe bw’Uburusiya bwo kwivuna ibitero vyo mu kirere mu karere ka Crimée/Crimea kari mu minwe y’Uburusiya.

Igisata ca Kyiv kijejwe igendereza (SBU) hamwe n’igisirikare kirwanira mu kirere ni vyo vyakoze iki gitero ku nyubakwa y’Uburusiya hafi ya Yevpatoriya bikoresheje ibisasu vya misire na za ndege zitagira abadereva (drone), nk’uko isoko ryo mw’iki gisata c’igendereza rya Ukraine ryabibwiye BBC.

Amashusho yacishijwe ku mbuga hwaniro yerekana umuriro n’umwotsi hafi y’igisagara, mu burengero bw’aka karere kihagiwe n’Uburusiya.

Moscou ntaco irashikiriza kuri ibi.

Ahubwo, ubushikiranganji bw’Uburusiya bujejwe kwivuna abansi buvuga ko bwakoroye amadrone atari make ya Ukraine, bunavuga ko bwatesheje igitero ku bwato bucungera ikiyaga.

Ejo ku wa kane mu masaha ya kare, harumvikanye ibiturika bitari bike mu karere ka Crimea kigaruriwe n’Uburusiya mu 2014.

Nk’uko bivugwa n’iri soko ry’igendereza rya Ukraine ryavuganye na BBC, muri iki gitero, Ukraine yakoresheje amadrone mu gusambura vya vyuma vy’inderetsi (radar), hanyuma ikoresha ibisasu vya misire mu gutera ibi bikoho birekura ibisasu vya misire.

Iri soko rivuga riti: "Inyuma yo gusambura ibigo vya radar, abasirikare barwanira mu mazi bakubise ibikoho vyo mu bwoko bwa S300 na S400 'Triumph', vy’agaciro k’imiriyaridi 1.2 z’amadorari y’Abanyamerika, hakoreshejwe ibisasu vya mirise vyo mu bwoko bwa Neptune ".

Ibi bisasu vya Neptune vyahinguwe n’igisirikare ca Ukraine kugira ngo bikoreshwe mu ntambara yo mu mazi, ariko bikaba vyarahinduwe kugira ngo bikoreshwe no mu ntambara yo ku butaka.

Bisubiramwo amakuru atangwa n’abahaba, ibinyamakuru vya Ukraine bivuga ko ibibombe vyaturaguritse mw’ijoro ry’ejo ku wa kane umwotsi ukaba wabonetse hafi y’ikigo ca gisirikare.

Igisata ca BBC kijejwe guhinyuza (BBC Verify) cakoze umwihwezo ku masanamu yo ku mbuga hwaniro kiremeza ko ari igitero kuri Yevpatoriya.

Ubushikiranganji bw’Uburusiya bujejwe kwivuna abansi ku ruhande rwabwo, buvuga ko iki gitero ataco kimaze ahubwo bukavuga ko bwakoroye amadrone 11 hejuru ya Crimea.

Abategetsi b’ako karere bagenywe n’Uburusiya ntaco bavuga ku vyoba vyononekaye muri ico kigo ca gisirikare canke kuri ivyo birwanisho vyo gukingira ikirere.

Ibikoho vyo mu bwoko bwa S400 vyo kwivuna ibitero vyo mu kirere bikoreshwa kuva mu 2007, bikaba ari ivyavuye mu bwoko bwa S300 bwakoreshwa muri ca gihe ‘intambara y’ukwikekana (guerre froide/Cold-War).

Misire zigezweho cane zishobora kugenda gushika ku birometero 400 zigashobora no kugema ikintu kiri ku birometero 48 uja mu kirere.

Ibi bikoho vyo mu bwoko bwa S400 bishobora gusambura indege n’ibisasu vya misire.

Ukraine isa n’iyiriko irongereza ibitero ku ngabo zigaruriye Crimea.

Ku wa gatatu, yakoze igitero gikomeye ku kivuko ca Sevastopol, icicaro gikuru c’amato y’Uburusiya ku kiyaga Cirabura Mer Noire/ Black Sea).

Abategetsi ba Ukraine bavuga ko amato y’intambara abiri y’Uburusiya yononekaye cane.

Abategetsi b’Uburusiya bavuga ko ibisasu vya misire cumi vyakoreshejwe muri iki gitero kivugwa ko cakomerekeyemwo abantu 24. Ikoreshwa ry’izi misire rirerekana ko Ukraine yongereje akariro mw’ikoreshwa ry’ibisasu biraswa kure.

Hagati aho, ubushikiranganji bwa Ukraine bujejwe ikigega bwavuze ejo ku wa kane ko iki gihugu citeze kwakira imiriyaridi 1.25 z’amadorari y’Abanyamerika avuye muri Amerika mu rwego rw’umugambi w’Ibanki y’Isi yose wo gufasha Ukraine uzwi nka PEACE (Public Expenditures for Administrative Capacity Endurance).

Abategetsi bavuga ko ano mafaranga azokoreshwa mu bikorwa atari ivya gisirikare, akazocishwa mu mashirahamwe afasha abatishoboye no mu bisata vy’uburezi hamwe n’ubuvuzi.