Ubwongereza v Espagne ku mukino wa nyuma w'igikombe cy'isi: Ibyo wamenya

Inyandiko gusa
Umukinnyi Georgia Stanway w'Ubwongereza yishimira igitego yatsinze Haïti

Ahavuye isanamu, Reuters

Insiguro y'isanamu, Umukinnyi Georgia Stanway w'Ubwongereza yishimira igitego yatsinze Haïti mu mukino w'iki gikombe cy'isi cy'abagore
    • Umwanditsi, Neil Johnston
    • Igikorwa, BBC Sport i Sydney

Ikipe y'igihugu y'umupira w'amaguru y'Ubwongereza y'abagore, ifite igikombe cy'Uburayi, ifite amahirwe yo kwandika amateka kuri iki cyumweru ku nshuro ya kabiri mu gihe kirenga gato umwaka umwe, ubwo iba ikina na Espagne ku mukino wa nyuma w'igikombe cy'isi cy'abagore i Sydney muri Australia.

Iyi kipe, yitwa the Lionesses (cyangwa intare z'ingore), iraba ishaka kwegukana iki gikombe ku nshuro ya mbere, ndetse ishaka no kuba ikipe ya mbere y'Ubwongereza itsinze umukino wa nyuma wo mu cyiciro cy'abakuru ku rwego rw'isi kuva mu mwaka wa 1966.

Mu nzira yayo hari ikipe ya Espagne, na yo iba irimo gukina umukino wa nyuma ku nshuro ya mbere. Abafana bagera ku 75,000 bitezwe kuba bari ku kibuga Stadium Australia, kureba uwo mukino utangira saa sita z'amanywa (12:00) ku isaha yo mu Rwanda no mu Burundi.

Ikipe itsinda uyu mukino iraba ibaye igihugu cya gatanu gitandukanye cyegukanye igikombe cy'isi cy'abagore, kuri iyi nshuro ya cyenda iri rushanwa ribaye.

Amerika (yacyegukanye inshuro enye), Ubudage (bwacyegukanye inshuro ebyiri), Norvège (yacyegukanye inshuro imwe) n'Ubuyapani (bwacyegukanye inshuro imwe), ni byo bihugu bindi bimaze gutsindira iki gikombe kugeza ubu.

Sarina Wiegman, umutoza w'Ubwongereza, yagize ati: "Buri muntu wese arimo kuvuga ku [mwaka wa] 1966, rero reka tube tumeze neza uko dushoboye kose ku cyumweru kandi tugerageze kugera ku ntsinzi".

Yongeyeho ati: "Kugera ku mukino wa nyuma birihariye ariko hamwe n'iyi kipe ndetse n'ingorane twagize, ukuntu buri gihe tubona uburyo bwo gucyemura ibibazo, byabaye ibintu bitangaje cyane - birihariye cyane kuba ku mukino wa nyuma ariko ubu turashaka no kuwutsinda".

Iyi kipe y'Ubwongereza igiye gukina umukino wa nyuma w'igikombe cy'isi hashize amezi 13 itsinze Ubudage ku kibuga cya Wembley, ikegukana igikombe cy'Uburayi ku nshuro ya mbere.

Skip Ibisomwa cane and continue reading
Ibisomwa cane

End of Ibisomwa cane

Jorge Vilda na Sarina Wiegman mu mukino wa Euro 2022

Ahavuye isanamu, AFP

Insiguro y'isanamu, Umutoza Sarina Wiegman (iburyo) yatsinze umutoza Jorge Vilda ubwo baheruka guhura muri Euro 2022

Ikipe y'igihugu ya Espagne, yitwa La Roja, itozwa na Jorge Vilda, ikinnye iyi mikino y'igikombe cy'isi ku nshuro ya gatatu, yitwaye neza kuva yanyagirwa n'Ubuyapani ibitego 4-0 mu cyiciro cyo mu matsinda, nyuma isezerera Ubusuwisi, Ubuholandi na Sweden.

Myugariro wayo Irene Paredes yagize ati: "Espagne buri gihe yamye ari igihugu gikunda umupira w'amaguru ariko ntiwari urubuga rwacu, cyangwa nibura ni ko batumye twiyumva [nk'abagore].

"Turashaka gukina umupira w'amaguru kandi [abatubanjirije] barahatanye nuko bitangira [bashora imari] kurushaho umupira w'amaguru w'abagore. Dufite amahirwe yo gukina ku mukino wa nyuma w'igikombe cy'isi. Iki ni igihe cyo kuryoherwa na byo".