Michael B Jordan yahinduye isura y'irushanwa rya Oscars ubwo Sinners yegukanaga ibihembo bikomeye

Umukinnyi wa filime w'umunyamerika Michael B Jordan yegukanye intsinzi itunguranye mu bihembo bya Actor Awards, byahoze byitwa Screen Actors Guild Awards, bimwongerera imbaraga mu byumweru bya nyuma mbere y'ibihembo bya Oscars.

Yagizwe umukinnyi mwiza wa mbere kubera uruhare rwe muri filimi iri mu ziteye ubwoba cyane yitwa Sinners, yanegukanye igihembo gikomeye cy'iryo joro, icy'itsinda ry'abakinnyi beza (Best Ensemble Cast).

Mu ijambo rye, Jordan yagize ati: "Sinzi n'aho natangirira, sinari niteze ibi na gato," yongeraho ko yumvise "ahawe icyubahiro gikomeye n'amahirwe adasanzwe" kuba yaratoranyijwe.

Mu kwakira igihembo cy'itsinda ry'abakinnyi beza, mugenzi we bakinanye, Delroy Lindo, yavuze ko gukora Sinners byari "urugendo rudasanzwe," yongeraho ati: "Buri munsi twazaga ari twe ubwacu, imitima yacu n'ubugingo bwacu muri uyu mushinga."

Lindo yagize ati: "Kumenyekana no gushimirwa namwe mwese, kuvuga 'murakoze' ntibihagije na gato ngo bigaragaze ibyo twumva, ishimwe n'ishimwe ryimbitse dufite."

Ibihembo bya Sinners byaje nyuma y'icyumweru kimwe habayeho Bafta Film Awards, aho Jordan na Lindo bashimiwe uburyo bitwaye neza kandi bagakomeza gutuza, nyuma y'uko John Davidson, uharanira uburenganzira bw'abarwaye Tourette, avugiye ku rubyiniro ijambo rishingiye ku ivangura ruhu atabigambiriye, mu gihe bombi bari bari ku rubyiniro.

Mu ijambo rye yakira igihembo, Jordan yashimiye nyina Donna, yazanye mu birori nk'umushyitsi we mu bihe byo kwakira ibihembo, mu kumushyigikira mu rugendo rwe rwo gukina film kuva ari muto

Yagize ati: "Mama ndagushimira ko wantwaraga tujya ndetse tunava i New York mu bihe tudafite amafaranga ahagije yo kunyura mu muhanda wa Harlem Tunnel, igihe twashakaga amafaranga yo kugura amavuta y'imodoka, n'aho gusiga imodoka".

Jordan yanashimiye kandi umuyobozi wa Sinners, Ryan Coogler, hamwe n'abandi bakinnyi bakorana nawe, avuga ati: "Buri wese wagize icyo akora kuri iyi filimi, mwaduhaye igihe cyanyu, impano zanyu n'ubugwaneza, bikanyemerera gukora akazi kanjye neza kurusha ibindi byose."

Amatora y'uyu mwaka ya Actor Awards yafunzwe ku wa Gatanu, iminsi itanu nyuma y'ibihembo bya Bafta, aho ijambo ry'irondaruhu ryavuzwe igihe Lindo na Jordan bari ku rubyiniro.

Lindo yemeye icyo kibazo mu kindi gikorwa cy'ibihembo ku wa Gatandatu, abwira abitabiriye ati: "Turashima ubufasha n'urukundo twahawe nyuma y'ibyabaye mu mpera z'icyumweru gishize."

"Ni urugero rwihariye rw'ikintu cyashoboraga kuba kibi cyane ahubwo kikaba cyiza cyane," yabivuze ari ku rubyiniro mu bihembo bya NAACP Image Awards. "Murakoze cyane ku bufasha bwanyu."

Catherine O'Hara yegukanye igihembo yahawe nyuma y'urupfu rwe

Ahandi, umukinnyi wa filime Home Alone na Schitt's Creek, Catherine O'Hara, wapfuye muri Mutarama, yatoranyijwe nka umukinnyi w'umugore mwiza muri komedi ya televiziyo kubera uruhare rwe muri satire ya Hollywood yitwa The Studio.

Mu gushimira O'Hara no kwakira igihembo mu mwanya we, umwanditsi wayo, Seth Rogen, yagize ati: "Yagaragaje koko ko ushobora kuba umuhanga, kandi ukaba inyangamugayo, kandi kimwe muri ibyo ntikigomba kubangamira ikindi.

"Ikintu cyantangaje mu byumweru bishize ni ubushobozi bwe bwo kuba umunyabuntu, inyangamugayo kandi wubaha abandi, mu gihe atigeze agabanya impano ze cyangwa ubushobozi bwe bwo gutanga umusanzu mu byo twakoraga."

Yakomeje avuga ati: "Yari azi ko ashobora gutsinda, kandi yashakaga gutsinda buri munsi mukazi"

Intsinzi ya O'Hara yari imwe mu nyinshi The Studio yegukanye, harimo n'itsinda ry'abakinnyi ba komedi beza (best comedy ensemble) n'umukinnyi mwiza wa komedi Seth Rogen (best comedy actor).

Abandi begukanye ibihembo bya televiziyo barimo Michelle Williams (Dying For Sex), Keri Russell (The Diplomat) n'umukinnyi w'Umwongereza Owen Cooper (Adolescence), ariko ntiyabashije kuba mu muhango wo muri Los Angeles ngo yakire igihembo cye.

Filime y'ubuvuzi ya The Pitt yegukanye igihembo cy'itsinda ryiza muri drama (best drama ensemble) n'umukinnyi mwiza muri drama ya televiziyo Noah Wyle, wabwiye bagenzi be ko "byari bikomeye, bigoye kandi bifite agaciro mu buryo ntashoboraga gutekereza, ariko ndareba mu maso yanyu ntahindura ikintu na kimwe."

Jessie Buckley yakomeje gutsindira ibihembo byinshi

Umukinnyi wa Hamnet, Jessie Buckley, yavuze ko ari "amahirwe akomeye cyane" gutsindira igihembo cy'umukinnyi w'umugore mwiza, icyiciro yakomeje guhatana no gutsindira mu gihe cyose cy'ibihembo.

Iyi filime ishingiye ku gitabo cya Maggie O'Farrell, Hamnet, ikavuga inkuru igice ari iy'imvugo y'ibinyoma n'ukuri ku rupfu rw'umuhungu wa William Shakespeare w'imyaka 11.

Mu kwakira igihembo cye, umukinnyi w'umugore w'Umunya-Irish yashimiye mugenzi we Emily Watson, wagaragaye ari mu bafana amushyigikira.

"Kugira ngo dusangire ibyo bice muri Hamnet, nzabibika mu mutima wanjye ubuziraherezo," Buckley abwira Watson. "Icyerekezo cyawe gishya, ubutwari bwawe butagira imipaka, n'ubwitonzi bwawe ni umucyo unyobora."

Yongeyeho ati: "Gukora akazi n'umutima wanjye mu biganza no guhagarara iruhande rw'inshuti zanjye z'intwari, zerekana imitima yazo, ni bwo buryo bwiza bwo kubaho ubuzima, murakoze cyane."

Ford yakira igihembo cya 'lifetime achievement award'

Harrison Ford yegukanye igihembo cy'ubuzima bwose (lifetime achievement award) nyuma y'imyaka hafi mirongo itandatu akina filime zirimo Star Wars, The Fugitive, Indiana Jones na Blade Runner.

"Biratangaje kubona igihembo cy'ubuzima bwose ku gice cya kabiri cy'umwuga wanjye," umugabo w'imyaka 83 atera urwenya. "Ntabwo biri kare cyane se?"

Yakomeje ati: "Kugira ubushobozi bwo kugeza akazi turemera hamwe ku bantu ni icyubahiro n'amahirwe. Kandi kubera ayo mahirwe, natangiye kwimenya neza.

"Uyu ni umwuga ukomeye kwinjiramo. Ku bwanjye byari bikomeye no kuwusohokamo, Imana ishimwe, kuko nkunda ibyo nkora."

Ford asoza ati: "Ndi umugabo w'umunyamahirwe, mfite amahirwe yo kubona abantu banjye, mfite amahirwe yo gukora akazi kangora, kandi mfite amahirwe yo gukomeza kugakora. Sinabifata nk'ibisanzwe."

Ese Sinners izegukana igihembo cy'ishusho nziza muri Oscars?

Ibibera muri iki gikorwa, Actor Awards bihitirwamo n'abandi bakinnyi, kandi bishobora gutanga ikimenyetso gikomeye cy'ukuntu umukinnyi cyangwa filime ihagaze mu irushanwa.

Filime Sinners yinjira mu Oscars ifite nomination 16, umubare mwinshi kurusha indi filime yose mu mateka y'ibihembo bya Academy.

Iyi filime yo mu bihe by'imyaka ya 1930 muri Mississippi Delta, ivuga inkuru y'abavandimwe babiri bimanga (bakinnwe na Michael B Jordan) bizeye gufungura ahantu hashya ho gukorera umuziki, ariko imigambi yabo igahungabanywa n'imbaraga mbi.

Filime iri mu zihatana zikomeye ku gihembo cya best picture muri Oscars, ariko ihangana cyane na One Battle After Another, yegukanye ibihembo bikomeye mu bindi bikorwa nk'ibihembo bya Golden Globe na Bafta Film Awards.

Intsinzi ya Jordan ku cyumweru ni ikimenyetso cy'uko hari inkunga ikomeye kuri Sinners, kandi byagaragaye neza uburyo Viola Davis na Samuel L. Jackson bishimye cyane batangaza ibihembo bibiri by'iyi filime.

Ariko Jordan yagize ikibazo mu gutsindira igihembo cy'umukinnyi mwiza ahandi kuri ibi bihembo, aho Timothée Chalamet, Wagner Moura na Robert Aramayo (utatoranyijwe muri Oscars) batsindiye igihembo mu bindi bikorwa byabanje.

Mu gihe ibindi byiciro bifite abahatana basobanutse cyane nko ku mukinnyi mwiza w'umugore Buckley intsinzi ya Jordan muri Actor Awards isiga irushanwa ry'umukinnyi mwiza mbere y'ibihembo bya Oscars ku wa 15 Werurwe.